Salonnikdə Qara dəniz ticarət və inkişaf bankı Direktorlar Şurasının 54-cü iclası keçirilib. İqtisadi İnkişaf Nazirliyindən Trend ə verilən məlumatda bildirilir ki, digər məsələlərlə yanaşı, Azərbaycana dair strategiyanın ilkin variantı da nəzərdən keçirilib. Həmin strategiyanın təsdiqi Direktorlar Şurasının 2007-ci il fevral ayında keçirilməsi planlaşdırılan növbəti iclasında gözlənilir.
Tədbir iştirakçıları QDTİB üzv-ölkələrlə müqayisədə 2005-2006-cı illərdə Azərbaycanda müşahidə olunan yüksək iqtisadi artım və dinamik inkişafı xüsusi qeyd etmiblər.
Keçirilən tədbir çərçivəsində Şuranın 4 xüsusi yığıncağı keçirilib ki, burada 2007-2010-cu illər üçün bankın biznes-planı təsdiq olunub. Bu plana əsasən, növbəti illərdə QDTİB üzv-ölkələrində həyata keçiriləcək layihələr üçün kredit həcminin iki dəfə artırılması gözlənilir.
Gələn ildən bankın iki üzvünün - Bolqarıstan və Rumınyanın Avropa İttifaqına daxil olması Qara dəniz bankının regiondakı nüfuzuna müsbət təsir göstərəcək. Azərbaycan tərəfindən iclasda Azərbaycan üzrə bankda direktor, iqtisadi inkişaf nazirinin müavini Mikayıl Cabbarov iştirak edib.