Azərbaycanın Maliyyə Nazirliyindən alınmış dəqiq məlumatlara görə, 2006-cı ilin üçüncü rübünün nəticələri üzrə ölkədə fəaliyyət göstərən 28 sığorta təşkilatının ödənilmiş nizamnamə kapitalı 39,1 mln. manat təşkil edib.
Maliyyə Nazirliyinin məlumatına istinadən Trend bildirir ki, bu göstərici keçən ilin analoji dövrü ilə müqayisədə 11,1 mln. manat və ya 39,6 faiz artıb.
Nizamnamə kaptalının böyük bir hissəsi (94,4 faiz və ya 36,9 mln.manat) pul formasında, 2,2 mln. manat (5,6 faiz) isə əmlak şəklində formalaşıb.
9 ay ərzində sığorta şirkətləri sərbəst pul vəsaitlərindən investisiyalara 37,54 mln. manat (o cümlədən 33,43 mln. manat bank depozitləri şəklində) yönəldiblər ki, bunun da nəticəsində 1,92 mln. manat həcmində gəlir əldə ediblər. Keçən ilin analoji dövrü ilə müqayisədə sığortaçılar 51,6 faiz, yaxud 12,78 mln. manat çox investisiya yatırıblar. İnvestisiya fəaliyyətindən gəlirlərin artımı müvafiq olaraq 92 faiz (0,92 mln. manat) təşkil edib.