Azərbaycan,Bakı/müxbir Trend İ.Xəlilova/Martın 12-də prezident tərəfindən təsdiq olunmuş Maliyyə Nazirliyinin Əsasnaməsinə dəyişikliklərə uyğun olaraq nazirliyin səlahiyyətləri genişləndirilib. Bu barədə rəsmi mətbuatda nəşr olunmuş Prezidentin sərəncamında deyilib.
Maliyyə Nazirliyinə zərurət yarandıqda təsdiq olunmuş büdcə ayırmaları həddində funksional təsnifatın bölmələri daxilində, iqtisadi təsnifatın bölmə, köməkçi bölmə, paraqraflar, maddə və yarımmaddələri arasında dəyişikliklər etmək səlahiyyəti verilib.
Maliyyə Nazirliyinə büdcə ili ərzində vahid xəzinə hesabında olan vəsaiti (sərbəst qalıq) idarə etmək və ya qanunvericiliklə müəyyən edilmiş qaydada idarəetməyə vermək həvalə olunub.
Həmçinin qiymətli metal və məmulatlara əyar vurmada dövlət rüsumu qoyulacaq və bu vəsaitlər birbaşa dövlət büdcəsinə daxil olacaq. Əvvəllər olduğu kimi Maliyyə Nazirliyi tərəfindən müəyyən edilmiş tariflərə əsasən qeyri-büdcə fondlarına daxil edilməyəcək. Dövlət rüsumunun ölçüsü qanunla müəyyən olunaraq Milli Məclis tərəfindən təsdiqlənəcək.