Azərbaycan, Bakı/ " TrendCapita " müxbir Ü.İsmayılova/ Nazirlər Kabinetinin ölkəyə gətirilən taxıl üçün ƏDV-nin ləğv olunması barədə qərarı çörəyin qiymətinin tənzimlənməsi istiqamətində ilk addımdır. Lakin bir bu qərarla çörəyin qiyməti ətrafında yaranmış ajiotajı tənzimləmək çətin olacaq. Bunu bu cümə günü Parlamentin iqtisadi siyasət daimi komissiyasının üzvü, millət vəkili Əli Məsimov bildirib.
"Hökumət bu məsələnin həllinə kompleks yanaşmalıdır",-deyə Məsimov deyib.
Deputatın sözlərinə görə, bu addım çörəyin qiymətinin artmasının qarşısını ala bilər, lakin idxaldan asılılıqdan azad olunmaq üçün hökumət daxili taxıl istehsalının vəziyyətinin yaxşılaşdırılması üçün tədbirlər görməlidir.
"Hesab edirəm ki, iqtisadiyyatın taxıl sahəsi də digər sahələrdən az gəlir gətirməməlidir", - deyə o söyləyib.
Məsimov qeyd edib ki, əgər hökumət kənd təsərrüfatı istehsalı, o cümlədən heyvandarlığın vəziyyətinin yaxşılaşdırılması üzrə ciddi tədbirlər görməyə başlayarsa, gələcəkdə bu, ətin qiymətinə də təsir edə bilər.
Nazirlər Kabinetinin qərarı ilə iyulun 27-dən ölkəyə gətirilən taxıldan ƏDV tutulması ləğv olunub.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
