Azərbaycan, Bakı / Trend , müxbir E.Hüseynli/ Bakı şəhər Dövlət Yol Polisi İdarəsi ictimai nəqliyyat vasitələrində nizam-intizamın yaradılması və yol hərəkəti qaydalarının pozulması hallarının qarşısının alınması məqsədilə reydlərə başlayıb. İdarənin Nəqliyyatın təhlükəsizliyinin təmini və ictimaiyyətlə əlaqə şöbəsinin müdiri Vaqif Əsədov bazar ertəsi Trend ə bildirib ki, ötən həftənin cümə günündən Bakının Nəsimi rayon ərazisində aparılan reydlər nəticəsində 48 avtobus sürücüsünün müvafiq sənədləri olmadığı üçün idarə etdikləri avtobus cərimə meydançalarına aparılıb.
Oturacaq yerlərinin sayının artıq olması, tıxacların yaranmasına səbəb olan yol-qayda pozuntuları, texniki cəhətdən nasaz avtomobil, müvafiq kateqoriyaların olmaması və digər yol hərəkət qaydalarının pozulması nəticəsində isə 130 avtobus sürücüsünə protokol tərtib olunub.