Azərbaycan, Bakı, 17 dekabr / Trend /
Azərbaycan yanvar-noyabr aylarında "Şahdəniz" qaz-kondensat yatağından 1 milyard kubmetrdən artıq qaz əldə edib. 2008-ci ilin analoji dövründə bu göstərici 2,4 milyard kubmetrə yaxın olub. Bu barədə ARDNŞ-nin məlumatında deyilir.
Bu dövr ərzində əldə edilən qazın ümumi həcmindən 467,8 milyon kubmetri ARDNŞ-nin "Şahdəniz" layihəsindəki iştirak payına düşür. Qalan hissəsi, yəni 537,8 milyon kubmetrə yaxın qaz isə ARDNŞ tərəfindən alınıb.
"Şahdəniz" yatağının işlənməsinə dair müqavilə 1996-cı il iyunun 4-də imzalanıb. Layihə iştirakçıları bunlardır: BP (operator) - 25,5 faiz, Statoil Hydro - 25,5 faiz, NICO - 10 faiz, Total - 10 faiz, LukAgip - 10 faiz, TPAO - 9 faiz, ARDNŞ - 10 faiz. Bu yataqda ümumi qaz ehtiyatı 1,2 trln. kubmetr həcmində qiymətləndirilir.
Hazırda "Cənubi Qafqaz" boru kəməri vasitəsilə Türkiyə və Gürcüstana qaz nəql olunur. 2009-cu ildə "Şahdəniz" yatağından layihənin işlənməsinin birinci mərhələsi çərçivəsində 7,2 milyard kubmetr qaz hasil ediləcək.
Bu yatağın işlənməsinin ikinci fazası çərçivəsində hər il 20 milyard kubmetrədək qaz hasil etmək planlaşdırılır.