Azərbaycan, Bakı, 17 dekabr / Trend /
ARDNŞ (Azərbaycan Respublikası Dövlət Neft Şirkəti) yanvar-noyabr aylarında Gürcüstana 885 milyon kubmetrə yaxın qaz ixrac edib. 2008-ci ilin analoji dövründə bu göstərici 610,5 milyon kubmetr olub. Bu barədə ARDNŞ-dən daxil olan məlumatda deyilir.
ARDNŞ noyabr ayında Gürcüstana 93,3 milyon kubmetr qaz ixrac edib.
Gürcüstana qaz tədarükü 2008-ci ilin aprel ayında başlayıb. 2008-ci ildə Gürcüstana ümumilikdə 788,93 milyon kubmetr qaz tədarük edilib.
Ötən ilin noyabrında Azərbaycanla Gürcüstan arasında müqavilə imzalanıb. Müqavilə 2009-cu ildən başlayaraq sonrakı beş il ərzində Gürcüstanın qaz bazarında ARDNŞ-nin fəaliyyətinin fəallaşdırılması imkanlarını nəzərdə tutur. Memoranduma əsasən, ARDNŞ layihənin realizəsi üçün Gürcüstan hökumətinin müəyyənləşdirdiyi qaz istehlakçıları qruplarını (sosial qruplar) təmin edəcək törəmə müəssisə yaradır.