Azərbaycan, Bakı, 9 mart / Trend , müxbir E.İsmayılov/
ARDNŞ (Azərbaycan Respublikası Dövlət Neft Şirkəti) martın sonlarına kimi Azərbaycanda öz brendi altında ilk yanacaqdoldurma stansiyasını (YDS) istismara verməyi planlaşdırır. Bu barədə çərşənbə axşamı ARDNŞ-dəki mənbə bildirib.
"Yanacaqdoldurma stansiyalarının inşası üzrə işlər davam edir və bu ayın sonunadək ilk YDS istismara veriləcək", - mənbə deyib.
Bundan əvvəl, ARDNŞ prezidenti Rövnəq Abdullayevin verdiyi məlumata görə, şirkət bu ilin birinci yarısında üç YDS-i istismara vermək niyyətindədir. Bu ilin ikinci rübündə ARDNŞ-nin brendi altında YDS-lərin sayı 10-a çatacaq.
Azərbaycanda ARDNŞ-yə məxsus YDS-lərin ümumi sayı 26 ədəd təşkil edəcək.
Hazırda ARDNŞ Gürcüstanda 32 YDS inşa edərək istismara verib. Bu il daha 30 YDS-in istismara verilməsi planlaşdırılır. Həmçinin, şirkət Ukraynanın neft məhsullarının pərakəndə satışı bazarında öz fəaliyyətini genişləndirir. ARDNŞ hazırda ölkədə 30-a yaxın YDS-in rebrendinqini həyata keçirir. Həmin YDS-lərdə neft məhsullarının satışına birinci rübün sonlarında başlanması gözlənilir.
