Azərbaycan, Bakı, 1 aprel /Trend/
Bu gün Azərbaycan Dövlət Neft Şirkətinin Sumqayıt Təlim-Tədris Mərkəzində (STTM) gənc mütəxəssis-fəhlələrin ilk buraxılış imtahanı olub. "Azərikimya" İstehsalat Birliyinin, ARDNŞ-nin Təlim-Tədris və Sertifikatlaşdırma İdarəsi rəhbərliyinin, həmçinin respublika mətbuatı nümayəndələrinin iştirakı ilə keçirilən imtahan zamanı sənaye müəssisələri, o cümlədən kimya sənayesi üçün mühüm peşələrdən biri olan tornaçı ixtisası üzrə texniki peşə təhsili almış 12 nəfər gənc imtahan komissiyası qarşısında öz nəzəri biliklərini və praktiki bacarıqlarını nümayiş etdirib.
Birlikdən Trend-ə verilən məlumata görə, imtahan başlamazdan əvvəl ARDNŞ-nin Təlim-Tədris və Sertifikatlaşdırma İdarəsinin Sumqayıt Təlim-Tədris Mərkəzinin pedaqoji kollektivi bu cür müasir texniki təlim-tədris ocağının yaradıldığı, gənclərin yüksək səviyyədə müxtəlif fəhlə ixtisaslarına yiyələnməsi üçün diqqət və qayğı göstərmiş ölkə Prezidentinə dərin minnətdarlıq ifadə edib. Məmnunluqla bildirilib ki, ikimərtəbəli tədris korpusuna, ixtisaslaşmış auditoriyalara malik, peşə təhsili üzrə müasir tədris vasitələri və texniki avadanlıqlarla - müxtəlif ixtisaslar üzrə maşın-mexanizmlər, qurğu və dəzgahlarla təchiz edilmiş STTM-də ötən ilin sentyabrında test imtahanı yolu ilə qəbul edilmiş 100 nəfər gənc müxtəlif fəhlə peşələri - aparatçı, tornaçı, maşinist, elektrik və qaz qaynaqçısı, nəzarət-ölçü cihazları üzrə çilingər və s. peşələr üzrə yüksək texniki təhsil almaq imkanı əldə ediblər.
Diqqətəlayiqdir ki, ixtisasdan asılı olaraq hər biri 6 və 10 ay davam edən kurslar zamanı gələcək mütəxəssislər STTM-in ixtisaslaşmış emalatxanaları ilə yanaşı "Azərikimya"nın müəssisələrində də istehsalat təlimi keçirlər.
Bu gün ARDNŞ-nin vitse-prezidentinin müşaviri Asif Şəfəqqətovun sədrlik etdiyi imtahan komissiyası, o cümlədən "Azərikimya" İB-nin baş mütəxəssisləri qarşısında peşə imtahanı verən tələbə-tornaçılar da yanvar-fevral aylarında Etilen-polietilen və Mexaniki-təmir zavodlarının, Təmir-tikinti İdarəsinin mexaniki sexlərində peşəkar tornaçıların və STTM-in təlim ustalarının, həmçinin sex mütəxəssislərinin nəzarəti altında istehsalat təcrübəsində olub, müxtəlif təyinatlı torna dəzgahlarında peşə vərdişlərinə bacarıqla yiyələniblər. Bunu imtahanın nəticələri də təsdiq edib - STTM-in ilk məzunları müvafiq nəzəri bilik və praktik bacarıq nümayiş etdirərək, sabahın gənc tornaçıları kimi istehsalata vəsiqə alıblar.
Tədbirdə "Azərikimya" İB-nin Müşahidə Şurasının sədri, Milli Məclisin deputatı Muxtar Babayev və ARDNŞ-nin Təlim-Tədris və Sertifikatlaşdırma İdarəsinin rəisi Fuad Süleymanov STTM-in rəhbərliyini və gənc tornaçıları ilk buraxılış münasibətilə təbrik edib, məzunlara gələcək əmək fəaliyyətlərində uğurlar arzulayıb.