Azərbaycan, Bakı, 14 aprel /Trend müxbir E. İsmayılov/
Proqnozlara görə, ARDNŞ (Azərbaycan Respublikası Dövlət Neft Şirkəti) 2014-cü ildə 150 min metr həcmində qazma işlərini həyata keçirəcək. Bu barədə bazar ertəsi Trend-ə ARDNŞ-dəki mənbə deyib.
2013-cü ildə bu göstərici 142 656 min metr olub.
Onun sözlərinə görə, ötən il yerinə yetirilən işlərin ümumi həcmindən 135 665 metr istismar, 6 991 metr isə kəşfiyyat işlərinin payına düşüb.
2013-cü ildə ümumilikdə Azərbaycan üzrə qazma işlərinin həcmi təxminən 270 min metr təşkil edib.
"Bu il qazma işlərinin həcminin 2011-ci il səviyyəsində olması gözlənilir", - deyə mənbə bildirib.
ARDNŞ 2009-cu ildə 168,2 min metr, 2008-ci ildə təxminən 203 min metr, 2007-ci ildə isə 190,4 min metr həcmində qazma işləri aparıb.
Mənbə qeyd edib: "Hazırda quyuların qazılması ARDNŞ-nin quruda, eləcə də dənzidə yerləşən yataqlarında aparılır. İlkin məlumatlara görə, bu il qazma işlərinin həcmi 150 min metrə yaxın təşkil edəcək".
2014-cü ilin yanvar-martında ARDNŞ 33 777 metr həcmində qazma işləri (birgə müəssisə və əməliyyat şirkətləri istisna olmaqla) həyata keçirilib. 2013-cü ilin birinci rübündə bu həcm 40 845 metr olub.
ARDNŞ-nin tərkibinə "Azneft" İB (quruda və dənizdə neft və qaz hasilatı müəssisəsi), "Azərikimya" İB (kimya sənayesi müəssisəsi),"Azəriqaz" (qaz paylanması) müəssisəsi daxildir.
ARDNŞ xarici tərəfdaşlarla birlikdə "Azəri-Çıraq-Günəşli" neft-qaz yatağı bloku və Xəzərdə "Şahdəniz" qaz-kondensat yatağının işlənməsi kimi iri layihələrdə iştirak edir.