Bakı. Maksim Tsurkov - Trend
BP şirkəti 2017-ci ilin sonunda “Şahdəniz” yatağından genişləndirlmiş Cənubi Qafqaz boru kəməri sistemi ilə sınaq rejimində qaz nəql edəcək.
Trend-in məlumatına görə, bunu jurnalistlərə BP-nin Azərbaycan, Gürcüstan və Türkiyə üzrə sabiq regional prezidenti, şirkətin hasilat, transformasiya və karbon üzrə baş əməliyyat rəhbəri Qordon Birrell deyib.
Q.Birrell qeyd edib: “Sınaq rejiminin məqsədi ondan ibarətdir ki, qazın 2018-ci ildə TANAP vasitəsilə Türkiyəyə, 2020-ci ildə isə TAP vasitəsilə Avropaya çatmasını yoxlayaq".
Baş əməliyyat rəhbəri “Şahdəniz-2” çərçivəsində artıq 12 quyunun qazıldığını deyib: “Bu, qaz istehsalı və ixracına başlamağa kifayət edir. 12 quyudan 3-ü artıq təmizlənib və istehsalata hazırdır".
Q.Birrel bildirib ki, Azərbaycan və Gürcüstan ərazilərində Cənubi Qafqaz boru kəmərinin genişləndirilməsi üzrə işlərin 93 faizindən çoxu başa çatıb.