Bakı. Trend:
Misir 2022-2023-cü maliyyə ilində xarici ölkələrə 8,5-10 milyard dollar dəyərində təbii qaz satmağı planlaşdırır.
Trend xəbər verir ki, bunu "Al Arabiya" telekanalına Misirin neft naziri Tarik əl-Mulla bildirib.
"İxrac üçün nəzərdə tutulan qazın həcmini artırmaq üçün elektrik enerjisi istehlakının rasionallaşdırılması üzərində işləyirik", - deyə nazir bildirib.
Onun sözlərinə görə, soyuqların başlaması ilə Misir ixrac üçün böyük həcmdə qazı mayeləşdirmə stansiyalarına göndərə biləcək. Nazir əlavə edib ki, ötən maliyyə ilində Misir 6,5 milyard dollardan çox yanacaq ixrac edib.
Qeyd edək ki, Misirin təbii qaz ehtiyatları 2,2 trilyon kubmetr qiymətləndirilir.