...

BMT EITI-ya lazımi dəstək göstərməyə hazır olduğunu bildirib

Energetika Materials 9 Dekabr 2006 15:11 (UTC +04:00)

Birləşmiş Millətlər Təşkilatının baş qərargahında Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsü üzrə (EITI) İdarə Heyətinin ilk iclası keçirilib. Trend Azərbaycan Dövlət Neft Fondunun məlumatına istinadən xəbər verir ki, Azərbaycan tərəfdən toplantıda idarə heyətində Azərbaycanı təmsil edən ARDNF-in İcraçı Direktoru Şahmar Mövsümov iştirak edib.

İclasda İdarə Heyətinin fəaliyyətinə dair müxtəlif məsələlər müzakirə edilib, həmçinin EITI Katibliyinin yerləşəcəyi məkanın müəyyən olunması ilə bağlı fikir mübadiləsi aparılıb. Bir neçə təklifin müzakirəsindən sonra Norveç hökumətinin təşəbbüsü nəzərə alınıb və Katibliyin bu ölkənin paytaxtı Oslo şəhərində yerləşməsi barədə qərar qəbul edilib.

Idarə Heyətinin üzvləri Şəffaflıq TəŞəbbüsünə qoşulmuş ölkələrin Təşəbbüsün tətbiqi ilə bağlı üzərinə götürdükləri öhdəliklərin yerinə yetitirlməsi məsələsini də müzakirə ediblər. Müzakirələr zamanı Azərbaycanın Təşəbbüsün həyata keçirilməsində dünya ölkələri arasında aparıcı rolu bir daha təsdiqlənib və Təşəbbüslə bağlı öhdəliklərini yerinə yetirməyən ölkələrin EITI-i tətbiq edən dövlətlərin siyahısından xaric edilməsi təklif olunub.

İclasdan sonra BMT-nin Baş Katibi Kofi Annan EITI-in İdarə Heyətinin sədrini qəbul edib. Baş katib EITI-in hasilat sənayesində şəffaflığın təmin edilməsi baxımından böyük əhəmiyyət kəsb etdiyini bildirərək BMT-nin Təşəbbüsə bütün lazımi dəstəyi göstərməyə hazır olduğunu qeyd edib.

Daha sonra keçirilən mətbuat konfransında Ş.Mövsümov bildirib ki, Azərbaycan höküməti BMT Baş Assambleyasında Şəffaflıq Təşəbbüsünü dəstəkləyən qətnamənin irəli sürülməsi məsələsinə baxacaq.

EITI üzrə İdarə Heyəti 16 oktyabr 2006-cı ildə Osloda Təşəbbüsün gələcək fəaliyyətinin əlaqələndirilməsi üçün təsis edilib. Onun başlıca funksiyaları EITI-nın ümumi inkişafı, onun strateji istiqamətləri və Təşəbbüsün səmərəli tətbiqi üzərində nəzarətin təmin olunması və onların növbəti beynəlxalq konfransda təqdim edilməsi üzrə tövsiyyələrin hazırlanmasıdır. İdarə heyətinə EITI-nı tətbiq edən beş ölkə - Azərbaycan, Qvineya, Qabon, Qırğızıstan və Nigeriya, Təşəbbüsü dəstəkləyən üç ölkə - ABŞ, Böyük Britaniya və Almaniya, eləcə də beş QHT, beş hasilat şirkəti və bir investisiya şirkətinin nümayəndələri daxildir.

Xəbər lenti

Xəbər lenti