Azərbaycan,Bakı/müxbir Trend Ü.İsmayılova/Bakı-Tbilisi-Ceyhan boru kəmərini idarə edən BTC Co boru kəməri şirkəti real olaraq Transbalkan Burqas-Aleksandrupolis boru kəmərinin rəqabət şəraitini qiymətləndirməlidir. Bu barədə bu gün ADNŞ-nin eks-prezidenti, hazırda Sahibkarlıq və Bazar İqtisadiyyatının İnkişafına Yardım Fondunun rəhbəri Sabit Bağırov bildirib.
Rusiya, Bolqarıstan və Yunanıstan Afinada Burqas-Aleksandrupolis neft kəmərinin inşası barədə müqavilə imzalayıb. Bu boru kəmərinin tikintisi təxminən 13 il müzakirə edilib. Layihənin dəyəri hələ səsləndirilmir. İlkin qiymətləndirmələrə görə, bu, təxminən 1 mlrd. dollar təşkil edir. "Burqas-Aleksandrupolis boru kəməri BTC üçün real rəqibdir", - deyə o bildirib.
Onun sözlərinə görə, boru kəmərinin sahibi olan şirkətlərin neft ixracatçılarına və tranzit dövlətlərin hökumətinə təklif edəcəyi şərtlərdən çox şey asılı olacaq.
BTC boru kəmərinin ümumi uzunluğu 1768 kilometr təşkil edir: 443 km - Azərbaycanda, 249 km-Gürcüstanda, 1076 km-Türkiyədə. Boru kəmərinin 8 nasos stansiyası var: ikisi Azərbaycanda, ikisi Gürcüstanda, dördü Türkiyədədir. Boru kəmərinin nəqletmə gücü 1 milyon barreldir. Neft kəmərin bir ucundan digər ucuna 10 gün ərzində çatır.
"Şübhəsiz ki, ixracatçılar Avropa bazarlarına nefti yaxşı tariflər, nəqletmənin təhlükəsizliyi, həmçinin yaxşı istismar və vaxtlı-vaxtında çatdırma təklif edəcək boru kəməri vasitəsilə çatdıracaq", - deyə o bildirib.
Bir sıra ekspertlər hesab edir ki, Bakı-Tbilisi Ceyhan və Burqas-Aleksandrupolis boru kəmərləri bir-birinə rəqib deyil, çünki layihələr müxtəlif məqsədlər üçün yaradılıb.
"Əlbəttə ki, Burqas-Aleksandrupolis boru kəməri KTK-nin genişlənməsindən sonra o, BTC-yə daxil ola biləcək "Tengiz" yatağının həcmini də özünə çəkə biləcəyi istisna edilmir",- ekspertlər hesab edir.
BTC Co və "Tengizşevroil" konsorsiumu artıq "Tengiz" yatağından Bakı-Ceyhan boru kəməri vasitəsilə kiçik neft partiyalarının ötürülməsi barədə razılığa gəlib. Konsorsiuma Amerikanın ChevronTexaco şirkəti rəhbərlik edir. Hazırda "Tengiz" yatağından neft Novorossiysk limanına qədər KTK boru kəməri vasitəsilə ixrac olunur.