Azərbaycan, Bakı /müx. Trend İ.Xəlilova/ Hindistan Azərbaycanla neft-qaz sahəsində əməkdaşlıqda maraqlıdır. Bunu bu gün Bakıda Hindistanın kommersiya üzrə dövlət naziri Cayram Rameş bəyan edib. "Biz çox istərdik ki, ARDNŞ-lə Hindistanın Dövlət Neft Şirkəti birgə müəssisə yaratsınlar. Konkret olaraq bu müəssisə Xəzərdəki neft-qaz ehtiyatlarını öyrənə bilər" - deyə o qeyd edib.
Hindistan bu gün Rusiya, Sudan, İran, İraq, Braziliya kimi ölkələrdə gerçəkləşən neft-qaz layihələrinin investorudur. C.Rameş onu da qeyd edib ki, ölkəsi Azərbaycanla qaz sənayesi sahəsində də əməkdaşlıqda maraqlıdır. "Şəhərlərdə qaz paylaşdırmaq üçün birgə müəssisə yaratmaq olar" - deyə o bildirib.
Qeyd edək ki, bu gün Hindistan nümayəndə heyəti bu kimi məsələləri Azərbaycanın Sənaye və Energetika Nazirliyində müzakirə edəcək.