Аzərbaycan, Bakı, 16 iyul /Trend, müxbir H.Vəliyev/
Göndərilən internet-trafikin sürətinə görə Azərbaycan Speedtest servisini yaradan "Ookla" şirkətinin Net Index reytinqində 59-cu yer tutur.
Nəticələr iyunun 15-dən iyulun 14-nə qədər keçirilən eksperimental tədqiqatlar əsasında alınıb. Testlərin aparılması üçün 59 160 unikal IP-ünvanlar seçilib.
Net Index reytinqinə əsasən, Azərbaycanda göndərilən trafikin orta sürəti 1,12 Mbit/s təşkil edir.
Azərbaycan göndərilən trafik reytinqinə görə Sinqapur (60-cı yer), Böyük Britaniya (70), İtaliya (76), İspaniya (87), İsrail (99) və s. ölkələri qabaqlayır.
Göndərilən internet-trafikin sürəti üzrə reytinqdə ilk üç ölkə Cənubi Koreya (19,32 Mbits), Litva (13,11) və Latviyadır (12,44).
Gələn trafik reytinqində Azərbaycan 81-ci yer tutur, burada istifadəçilər 2,82 Mbit/s sürətlə şəbəkəyə qoşulurlar. Bu göstərici ilə Azərbaycan Ermənistanı (86-cı yer) - 2,55 Mbit/s, Malayziyanı (101) - 2,12 Mbit/s, Meksikanı (103) - 2,06 Mbit/s, Özbəkistanı (124) - 1,51 Mbit/s, İranı (153) - 0,61 Mbit/s və digər ölkələri geridə qoyur.
İlk üçlüyə Cənubi Koreya (32,47 Mbit/s), Latviya (23,78 Mbit/s) və Aland adaları (22,01 Mbit/s) daxildir.