Azərbaycan, Bakı, 7 iyun /Trend, müxbir H.Vəliyev/
Azərbaycanın dövlət qurumları Azərbaycanda mobil telefonların IMEI kodlarının qeydiyyatı prosedurunu tənzimləyən yekun sənədə əlavə və dəyişikliklər ediblər. Bu barədə Trend-ə çərşənbə axşamı RCom şirkətinin rəhbəri Seymur Məmmədov deyib.
Məmmədovun sözlərinə görə, əsas dəyişikliklər prosedur məsələlərinə aid olub. Onlardan bir neçəsi ümumi qəbul edilən sənədlərə və qanunvericilik aktlarına uyğunlaşdırılıb.
"Məsələn, Gömrük Komitəsi təklif olunan prosedurların bir neçəsinin Gömrük Məcəlləsinə zidd olduğunu aşkarlayaraq öz dəyişikliklərini edib. Bu, bir sıra digər məqamları razılaşdıran qurumlara da aiddir", - Məmmədov qeyd edib.
Yekun sənədin bütün bəndlərinin üzərində iş başa çatdıqdan sonra o, Nazirlər Kabinetində təsdiqlənməlidir. Bundan sonra sənəd qüvvəyə minəcək. Bu, qısa müddət ərzində mobil telefonların IMEI kodlarının qeydiyyatı sistemini işə salmağa imkan verəcək.
Məlumat bazası Azərbaycan ərazisinə gətirilən mobil telefonların IMEI kodlarının sayəsində artacaq. Qeydiyyat həm gömrük orqanları vasitəsilə, həm də operatorun şəbəkəsinə qoşularkən həyata keçiriləcək.
Yeni sistem həm oğurluqla, həm də ölkəyə qeyri-qanuni idxalla effektli mübarizə aparmağa imkan verəcək. Məlumat bazası yaradıldıqdan sonra mobil telefon bazarının vəziyyəti barədə məlumat əldə ediləcək (bazarın həcmi, qanuni və qeyri-qanuni məhsulların keyfiyyəti).
Bundan əvvəl Məmmədovun dediyinə görə, sistem təcrübi istismara tam hazırdır və qeydiyyat prosedurunu tənzimləyən hüquqi təsdiq aldıqdan sonra işə salınacaq. İlkin olaraq, sistem təcrübü istismara artıq bu ilə verilə bilər.
