Azərbaycan, Bakı, 11 avqust /Trend, müxbir H.Vəliyev/
Azərbaycan Milli Elmlər Akademiyasının Fizika İnstitutu "EduGrid" layihəsi çərçivəsində təhsil müəssisələrində Grid-seqmentinin tətbiqinə başlayır. Bu barədə Trend-ə institutun Yüksək enerjilər laboratoriyasının müdiri Övsət Abdinov deyib.
Onun sözlərinə görə, hazırda institut tərəfindən Grid-texnologiyalar sahəsində elmi nəticələrin əldə edilməsini nəzərdə tutan platforma hazırlanıb. Grid-texnologiyalar formalaşdırılan virtual məkanın informasiya infrastrukturunun əsasını təşkil edir. Bu, layihə iştirakçısının hər birinə tezliklə Grid-əlavələrin yaradılmasında bacarıqlar qazanmağa, eləcə də məlumatların paylanmasının idarə edilməsi üçün Grid-mühitdən istifadə təcübəsi əldə etməyə imkan verəcək.
Grid-seqmentindən istifadə edəcək məktəblər institutun şəbəkəsi vasitəsilə onlayn rejimdə dünyada istənilən müəllimlə ünsiyyət qura, canlı mühazirələr, video-konfranslar və s. təşkil edə biləcəklər.
İlk növbədə Fizika İnstitutu Grid-seqmentinin Zərifə Əliyeva adına məktəbdə tətbiqini nəzərdə tutur.
Grid-seqmenti yüksəksürətli kopüter şəbəkəsi olmaqla resurslardan vahid şəkildə istifadə imkanına malikdir. Grid-in təhsil seqmentində olması təhsilin alınması prosesində məsafəli ünsiyyət üçün yeni imkanlar açacaq.