Martın 24-də Azərbaycanın Rabitə və İnformasiya Texnologiyaları Nazirliyi Lənkəranda zona kollegiyası keçirəcək. Dövlət strukturunun informasiya mərkəzinin rəhbəri Müşfiq Əmirov Trend ə bildirib ki, Lənkəranın mərkəzi poçt şöbəsində keçiriləcək tədbirdə nazir Əli Abbasovun başçılığı ilə Rabitə Nazirliyinin şöbə və müəssisələrinin müdirləri, Lənkəran İcra hakimiyyətinin nümayəndələri iştirak edəcək.
Onun sözlərinə görə, kollegiya 2004-2008-ci illərdə Azərbaycan regionlarının sosial-iqtisadi inkişafı üzrə dövlət proqramına əsasən keçirilir.
Tədbirin əsas mövzusu cənub regionlarında, eləcə də ölkənin digər bölgələrində informasiya-kommunikasiya texnologiyalarının inkişafı və bunların gələcək perspektivlərinin müzakirəsidir.
Həmin gün yeni rabitə obyektlərinin istismara veriləcəyi də istisna edilmir.