Bu gün Azərbaycan Rabitə və İnformasiya Texnologiyaları Nazirliyində Cisco şirkəti ilə "E - hökümət: problemlər və həllər" adlı birgə seminar keçirilib. Tədbirin başlıca məqsədi elektron hökümət sahəsində şirkətin təcrübəsi ilə tanışlıq və bu təcrübənin Azərbaycanda tətbiq olunması imkanından ibarətdir.
Nazirlikdən Trend ə verilən xəbərə görə, seminarı çıxış nitqi ilə açan rabitə və informasiya texnologiyaları naziri, akademik Əli Abbasov e-hökümət üzrə prezident İlham Əliyevin 21 oktyabr 2005-ci ildə təsdiq etdiyi 2005-2008-ci illərdə Azərbaycanda rabitə və informasiya texnologiyalarının inkişafı üzrə dövlət proqramı çərçivəsində keçirilmiş tədbirlər haqqında danışıb.
Ə.Abbasov vurğulayıb ki, hazırda ölkənin qeyri-neft sektoruna maraq artır, artıq bir sıra böyük İKT şirkətləri Azərbaycanda öz nümayəndəliklərini açıblar.
Sonra "Azərbaycanda e-hökümətin hazırki statusu və gələcək perspektivlər" mövzusunda təqdimatla "Milli elektron idarəetmə şəbəkəsinin təşəbbüsü" (National E-Governance Network Initiative) layihəsinin rəhbəri İlyas Naibov-Əylisli və "e-hökümət təcrübəsi haqqında və Azərbaycanda E-hökümət layihəsinin reallaşdırılması strategiyasının metodologiyası" təqdimatı ilə Cisco şirkətinin nümayəndəsi Asya Rudkovskaya çıxış edib.
Daha sonra bu məsələlər ətrafında müzakirələr aparılıb, bir sıra nazirlik, komitə nümayəndələri, İKT üzrə layihələrin, qeyri-hökümət təşkilatlarının və Azərbaycan Milli elmlər akademiyasının informasiya texnologiyalarının rəhbərləri çıxış edib.
Seminarı rabitə naziri Ə.Abbasov öz nitqi ilə bağlayıb və gələcəkdə də analoji tədbirlərin keçirilməsi zərurətini vurğulayıb.