Azərbaycan,Bakı/müxbir Trend S.Babayeva/Azərbaycanın "İnternet Forum" QHT-si Milli Məclisin rəhbəri Oqtay Əsədov, rabitə və informasiya texnologiyaları naziri Əli Abbasov və daxili işlər naziri Ramil Usubova "Telekommunikasiya haqqında" qanuna dəyişikliklərin edilməsi və bu sahədə qanunvericiliyin təkmilləşdirilməsi, mobil rabitə xidmətinin səviyyəsinin yaxşılaşdırılması, mobil rabitə operatorları və istifadəçilər arasında sivil münasibətlərin yaradılması ilə bağlı müraciət edib. Bu barədə QHT-dən məlumat verilib.
Təşkilat hesab edir ki, son dövrlərdə mobil telefon istifadəçilərinin sayının hədsiz dərəcədə artması ciddi problemlər yaradıb. Təbii ki, mobil telefon abunəçilərinin sayı artdıqca telefonlara tələbat da artır. Tələb artdıqca ucuz qiymətə telefon təklif edənlər artsa da , ölkədə mobil telefon bazarında tələb-təklif münasibətlərinin normal məcraya yünəldilməsinə ciddi zərurət duyulur.
Müşahidələr göstərir ki, mobil telefonların itirilməsi və oğurlanması halları xeyli çoxalıb. Oğurlanmış telefonlara operatorlar tərəfindən xidmət göstərilməsi təbii ki, istisna təşkil etmir. Təəssüf ki, ölkə qanunvericiliyində oğurlanmış telefon aparatlarına mobil operatorlar tərəfindən xidmət göstərilməməyi təsbit olunmayıb. Oğurlanmış telefonların vahid bazasının olmaması hansısa bir və ya bir neçə operator tərəfindən bu cür qeydiyyatın aparılmasını da əhəmiyyətsiz edir. Hətta oğurlanmış telefon aparatlarının tapılması ilə bağlı bəzi operatorlar tərəfindən müraciətlər belə qəbul edilmir.
Oğurlanmış telefon aparatlarının tapılması ilə bağlı mobil operatorlarla hüquq -mühafizə orqanlarının birgə fəaliyyəti ilə və bu sahədə qanunvericiliklə bağlı müəyyən problemlər mövcuddur. Oğurlanmış aparatlarla bağlı operatorlar və polis orqanları tərəfindən ərizələrin qəbulu və icrası prosesinin təkmilləşdirilməsinə ciddi ehtiyac duyulur.
"Telekommunikasiya haqqında" və "İnformasiya əldə edilməsi haqqında" qanunların qəbulundan sonra abunəçilər, mobil operatorlar və dövlət arasındakı münasibətlərin beynəlxalq və yerli qanunvericiliyə uyğun qurulması zərurətə çevrilib.
1.Mobil operatorlar və hüquq-mühafizə orqanlarının birgə iştirakı ilə oğurlanmış telefon aparatlarının vahid bazasının yaradılmasının məcburiliyi və telefon alınarkən onun oğurluq olub-olmamasını Online formasında müəyyən etməyə imkan verən informasiya sisteminin yaradılmasının zəruriliyi haqqında müddəalar "Telekommunikasiya haqqında" qanuna əlavə edilsin.
2.Ölkə üzrə oğurlanmış telefonların vahid bazasının oğurluq telefonların beynəlxalq və regional məlumat bazalarına qoşulmasının vacibliyi haqqında müddəa "Telekommunikasiya haqqında" qanuna əlavə olunsun.
3.Oğurlanmış telefon aparatlarına mobil operatorlar tərəfindən xidmət göstərilməsinin qadağan edilməsi haqqında Telekommunikasiya haqqında" qanuna əlavə olunsun.
4.Oğurlanmış aparatlarla bağlı operatorlar və polis orqanları tərəfindən vətəndaşların ərizələrinin qəbulu və icrası prosesinin təkmilləşdirilməsi və bu sahədə şəffaflığın təmin edilməsi istiqamətində addımlar atılsın.
5.İstifadəçilər, mobil operatorlar və dövlət arasında münasibətlərin daha effektiv və sivil normalara uyğun qurulması üçün "Telekommunikasiya haqqında", "İnformasiya əldə edilməsi haqqında" və "İstehlakçıların hüquqlarının qorunması" haqqında qanunların tələbləri nəzərə alınmaqla "Mobil rabitə xidmətinin göstərilməsi qaydaları" hazırlansın.