Azərbaycan, Bakı, 1 fevral /Trend, müxbir M.Əliyev/
Türkiyənin Antalya şəhərində təlim-məşq toplantısı keçirən Gəncənin "Kəpəz" futbol klubunun heyəti qeyri-sabit hava şəraitinə görə Vətənə qayıda bilmir. Bu barədə çərşənbə günü Trend-ə klubun prezidenti Elmir Əliyev məlumat verib.
Klub üzvləri hazırda aeroportda uçuşun baş tutma vaxtını gözləyirlər.
Əliyev bildirib ki, uçuş bu gün Türkiyə vaxtilə saat 12:00-da (Bakı vaxtilə 14:00) baş tutmalı idi. Lakin uçuş Bakı vaxtilə saat 19:00-dək təxirə salınıb.
"Kəpəz" klubu Antalya şəhərində bir həftəlik təlim məşq toplantısı keçirib. Bu müddət ərzində Azərbaycan klubu üç yoxlama oyunu keçirib və hər üçündə qalib gəlib.