İran Parlamentinin nümayəndəsi Məhəmməd Sadat İbrahimi bildirib ki, İranın energetika naziri Məcid Namcunun Parlamentdə hesabat verməyə çağırılması (impiçment) üçün parlament nümayəndələri tərəfindən layihə hazırlanıb. Bu barədə İranın "jamejamonline.ir" qəzeti məlumat yayıb.
İbrahimin sözlərinə görə, Parlament nümayəndələri bu layihəni Parlamentin rəyasət heyətinə təqdim etməyə hazırlaşır.
Onun sözlərinə görə, layihəni hazırlayanlar energetika nazirinin vəzifə səlahiyyətlərini düzgün icra edə bilməməsini və həmin nazirliyin qarşısında duran məqsədlərə çata bilməməsini impicment üçün səbəb göstəriblər.
Məcid Namcu İran prezidenti Mahmud Əhmədinejad tərəfindən noyabrda Parlamentə energetika naziri postuna nam kimi təqdim olunub. Namcu nazir olmamışdan öncə İranın su təchizatı və kanalizasiya mühəndislik şirkətinin icraçı direktoru vəzifəsində çalışıb.
Əhmədinejad ötən prezidentlik dövründə Nazirlər Kabinetinin səlahiyyətlərinin yenidən baxılması təhlükəsi ilə üzləşmişdi. Xüsusilə, prezidentlik dövrünün sonlarında kabinetdə baş vermiş dəyişikliklər, istefalar və impiçmentlər nəticəsində bu təhlükə daha çox nəzərəçarpan idi. Əhmədinejadın ötən prezidentliyi dövründə onun istefaya göndərdiyi və könüllü olaraq istefa verən nazirlərin sayı 8 olub. Bir nazir isə vəfat etdiyi üçün başqası ilə əvəzlənmişdi. Ötən prezidentlik dövründə Əhmədinejad hökumətinin sabiq daxili işlər naziri Əli Kordanın parlamentə hesabat üçün çağırılması ən qalmaqallı impiçment olmuşdu. Onun fəxri diplomunun saxta olması Parlament nümayəndələrinin etirazına səbəb olmuş və o, nazir vəzifəsindən uzaqlaşdırılmışdı.