Həlak olan 16 beynəlxalq hüquq müdafiəçisinin əksəriyyəti Türkiyə vətəndaşıdır. Bu barədə "Cihan" agentliyi məlumat verib.
İsrail HDQ-nin mühasirədə olan Qəzza sektoruna humanitar yük daşıyan gəmi karvanının ələ keçirilməsi ilə bağlı əməliyyatları zamanı 16 nəfər həlak olub və 50-dən çox adam yaralanıb. Bu arada İsraildəki hərbi mənbələr 10 nəfəfrin həlak olduğunu iddia edirlər.
İsrail KİV-in məlumatına görə, hərbçilər göyərtədəki hüquq müdafiəçilərinin gəmilərdən hücuma keçmələrindən sonra, cavab tədbirləri görməyə məcbur olublar.
Türkiyənin Baş naziri Rəcəb Tayyib Ərdoğan bazar ertəsi Latın Amerikası ölkələrinə səfərini yarımçıq qoyub və Ankaraya qayıdır. Türkiyə Baş Qərargahının rəhbəri Ülkər Başbuq da öz növbəsində, Misirə səfərini dayandıraraq bazar ertəsi ölkəyə qayıdıb. Bu barədə "Cihan" agentliyi məlumat verib.
Türkiyə XİN İsrail hərbçilərinin hərəkətlərini kəskin pisləyərək, onları " yolverilməz " adlandırıb və İsrail hökumətindən rəsmi izahat tələb edib. Bu barədə idarənin buraxdığı xüsusi bəyanatda deyilir. Türkiyə XİN İsrailin Ankaradakı səfiri Qabi Levini izahat vermək üçün çağırıb.
"Azadlıq donanması"nın tərkibinə altı gəmi daxildir. Onlar mühasirədə olan Qəzzaya, ən azı, 600 hüquq müdafiəçisi və 10 min ton humanitar yük daşıyıblar. İsrail bundan əvvəl də karvanı hədələmişdi. O, gəmiləri yedəyə alaraq, öz limanlarından birinə gətirəcəyini və səfər iştirakçılarını deportasiya edəcəyini açıqlayaraq, Qəzza sektoruna yaxınlaşmağı qadağan etmişdi.