İsrailin müdafiə naziri Ehud Barak Türkiyənin xarici işlər naziri Əhməd Davudoğlu ilə telefonla danışıqlar aparıb. Bu barədə Türkiyənin "Sabah" qəzeti məlumat verib.
Söhbətin təfərrüatları açıqlanmır. Yalnız İsrail HDQ-nin mühasirədə olan Qəzza sektoruna humanitar yardım çatdırmalı olan beynəlxalq donanmaya bugünkü hücumunun müzakirələrin əsas mövzusu olduğu bildirilir.
Dəqiqləşdirilmiş məlumatlara görə, İsrail xüsusi xidmət əməkdaşlarının hücumu nəticəsində, 19 nəfər həlak olub və onlarca adam yaralanıb. Bu barədə RBK məlumat yayıb.
İsrailin müdafiə idarəsinin verdiyi məlumata görə, toqquşma hüquq müdafiəçilərinin gəmiləri buraxmaqdan imtina edən İsrailin dəniz sərhədçilərinə bıçaq və dəyənəklərlə hücum etməsindən sonra başlayıb.
Türkiyə XİN İsrail hərbçilərinin hərəkətlərini kəskin şəkildə pisləyib və İsrail rəhbərliyindən təcili izahat tələb edib.
"Azadlıq donanması"nın tərkibinə 6 gəmi daxildir. Onlar mühasirədə olan Qəzzaya, ən azı, 600 hüquq müdafiəçisi və 10 min ton humanitar yük daşıyıblar. İsrail bundan əvvəl də karvanı hədələmişdi. O, gəmiləri yedəyə alaraq, öz limanlarından birinə gətirəcəyini və səfər iştirakçılarını deportasiya edəcəyini açıqlayaraq, Qəzza sektoruna yaxınlaşmağı qadağan etmişdi.
Trend-in ən mühüm və maraqlı xəbərlərini "Telegram"da izləyin
.jpg)
