Tehran baş prokroru Abbas Cəfəri Dövlətabadi bildirib ki, İranda xarici qüvvələrə casusluq edən 5 nəfərin işi məhkəməyə göndəriləcək. Bu barədə İRNA agentliyi məlumat verib.
Dövlətabadi casusluqda ittiham olunan şəxslərin adlarını açıqlamayıb.
Dövlətabadi əlavə edib ki, son zamanlar ABŞ-ın İranda casusluq cəhdləri intensivləşib. Ötən həftə İran Atom Enerjisi Təşkilatının rəhbəri Əli Əkbər Salehi bu təşkilatın bir neçə əməkdaşının ABŞ-a casusluq etdiyini bildirib. Qərb İranı nüvə silahı istehsalına cəhd etməkdə günahlandırır. İran isə bunu qəbul etmir və nüvə proqramı fəaliyyətlərinin dincməqsədli olduğunu deyir. İndiyədək BMT TŞ İrana qarşı 6 qətnamə çərçivəsində 4 sanksiya tətbiq edib.