İran xalqı heç vaxt iri dövlətlərin qorxutma cəhdlərinə uymayacaq və öz ideallarından imtina etməyəcək. Bunları İranın ali dini lideri Seyid Əli Xamneyi bildirib. Məlumatı IRNA agentliyinə istinadən Press-TV yayıb.
"İran xalqı malik olduğu gücə və özünəəminliyi sayəsində nüfuzlu iri dövlətlər tərəfindən təhdidlərə qarşı mübarizə aparmağa nail olacaq", - Xamneyi səkkizillik İran-İraq müharibəsində həlak olanların ailələri ilə görüşü zamanı bildirib.
"Dünyada İrana mənfi təsir göstərə biləcək müxtəlif siyasi hadisələrə baxmayaraq, İran xalqı dünyada baş verən bütün dəyişikliklərə təsir göstərə bilir", - o deyib.
O qeyd edib ki, İranın qələbəsi pulun, maliyyə resurslarının və atom silahının köməyi ilə dəstəklənən gücə deyil, inamdan əmələ gələn gücə əsaslanır.