Azərbaycan, Bakı, 23 may /Trend/
Ukraynanın Donetsk vilayətində Karlovka kəndi yaxınlığında gedən döyüşdə "Donbass" batalyonunun 9 döyüşçüsü yaralanıb. Bu barədə vilayətin "Donbass" könüllü ərazi müdafiə batalyonunun komandiri Semyon Semyonçenko özünün "Facebook" səhifəsində yazır. Trend-in məlumatına görə, xəbəri cümə günü UNİAN yayıb.
S.Semyonçenko bildirib: "Batalyona qarşı avtomatçılar, snayperlər və tank əleyhinə əl qumbaraları işləyir. Yaralılar var. Çəkilə bilmirik, ona görə ki, insanların bir qismi mühasirədədirlər. Yaxınlıqda olan hərbi hissələrdən kömək xahiş edirik".
O əlavə edib ki, "döyüş yerinə yaraqlıların BTR-i yaxınlaşır, irikalibrli pulemyotlar gətirilib, bizə qumbaralar atılır".
Komandir xəbər verir: "Krasnoarmeysk qəsəbəsinin 15 kilometrliyində 4 BTR-lə Ukraynanın ordu blok-postu yerləşir. Biz yoldaşlarımıza yaxınlaşa bilmirik, snayperlər işləyirlər".
Semyonçenko qeyd edib ki, ordu komandanlığında onun telefonla etdiyi əlavə kömək göndərilməsi ilə bağlı müraciətlərinin heç biri eşidilməyib.