İran, Tehran. Təmkin Cəfərov - Trend:
İranda "Hodhod3" adlı şaquli vəziyyətdə uçan pilotsuz təyyarə xüsusi vəziyyətlərdə çəkiliş aparmaq üçün "Dideban1" adlı optik izləmə cihazı ilə təchiz olunub. Bunu İranın Şərif Texniki Universitetinin "Hodhod3" adlı şaquli vəziyyətdə uçan pilotsuz təyyarə layihəsini icra edən qrupun üzvi Mustafa Həsənpənah deyib. Trend-in məlumatına görə, bu barədə İranın Mehr agentliyi məlumat verib.
M.Həsənpənah bildirib ki, "Hodhod3" pilotsuz təyyarəsi şaquli vəziyyətdə enə və qalxa bilir: "Pilotsuz təyyarənin enib-qalxması üçün xüsusi enmə zolagına ehtiyac yoxdur. Pilotsuz təyyarə multirotor tiplidir və səssiz uçuş həyata keçirə bilir. Multirotor uçuş üçün tez bir zamanda hazırlana bilir, motorlarından birini itirsə belə, uçuşu davam etdirə bilir."
Onun sözlərinə görə, pilotsuz təyyarə 53 dəqiqə havada uçuş həyata keçirə bilir: "Hava şəraiti pis olduğu zaman (güclü külək və toz torpaq) belə aparat uçuşunu davam etdirə bilir. Aparat gecə və gündüz uçuşlar həyata keçirir".
M.Həsənpənah qeyd edib ki, aparatın üzərinə quraşdırılmış "Dideban1" optik izləmə cihazı 16 meqapiksel şəkil və "full HD" formatında vidoe çəkir: "Çəkilişlər az işıqda və keyfiyyətini itirmədən 48 dəfə böyütmə qabiliyyətinə malikdir".
Onun sözlərinə görə, "Dideban1" optik izləmə cihazının müxtəlif növ təyyarələr, vertolyotlar, multirotorlar, şarlar və pilotsuz təyyarələrin üzərinə quraşdırmaq imkanı var: "Dideban1" optik izləmə cihazının özəlliyindən biri budur ki, uçuş zamanı titrəməni sıfıra endirir və şəkil və videonu yüksək keyfiyyətlə çəkir. Həmçinin cihazın üzərindəki lazerlə hədəfləri dəqiq nişan alma qabiliyyəti var."
M.Həsənpənah deyib ki, "Dideban1" optik izləmə cihazı ilə yerdən şaquli vəziyyətdə ardıcıl şəkil çəkmək imkanı var və bu xəritə hazırlamaq üçün əlverişli şərait yaradır: "Dideban1" optik izləmə cihazı ilə təchiz olunmuş "Hodhod3" pilotsuz təyyarəsindən sərhədlərdə, narkotik maddələrlə mübarizədə, ekoloji vəziyyətin araşdırılmasında, dağlarda və meşələrdə vəziyyətin öyrənilməsi üçün istifadə oluna bilər. Bundan başqa neft, qaz, elektrik ötürmə xətlərinə nəzarət, yanğından mühafizə və s. bu kimi hallarda da pilotsuz təyyarənin imkanlarından istifadə etmək mümkindir".
Trend-in ən mühüm və maraqlı xəbərlərini "Telegram"da izləyin
.jpg)
