Bakı. Trend:
ABŞ prezidenti Co Bayden və Böyük Britaniyanın Baş naziri Boris Conson öz vətəndaşlarının Əfqanıstandan təxliyəsi ilə əlaqədar irəliləyiş və G7 sammitini müzakirə ediblər.
Trend-in məlumatına görə, bu barədə Ağ Evin press-relizində bildirilib.
Məlumatda qeyd olunub: "ABŞ prezidenti Co Bayden və Böyük Britaniyanın Baş naziri Boris Conson bu gün Əfqanıstan haqqında danışıq aparıblar. Onlar öz vətəndaşlarını, yerli işçiləri və digər həssas Əfqanları təxliyə etmək üçün diplomatik və hərbi personalımızın davamlı səylərini müzakirə ediblər".
Qeyd olunub ki, tərəflər "G7" liderlərinin virtual görüşü üçün sabahkı planları da müzakirə ediblər. Danışıq zamanı mövcud vəziyyətin həllində və Əfqanıstanla bağlı ortaq bir siyasi yanaşmanın qurulmasında müttəfiqlər və tərəfdaşlarla sıx koordinasiyanın vacibliyi vurğulanıb.