Bakı. Trend:
Ötən gecə İranın şimal-qərbində yerləşən Qərbi Azərbaycan vilayətinin Xoy rayonu ətrafında baş verən zəlzələ nəticəsində indiyədək 582 nəfər yaralanıb.
Trend-in məlumatına görə, bunu İranın Fövqəladə Hallar Təşkilatının sədri Məhəmməd Həsən Nami deyib. Onun sözlərinə görə, yaralınardan 135 nəfər xəstəxanaya yatırılıb və 5 nəfər əməliyyat olunub.
Həsən Nami əlavə edib ki, zəlzələ nəticəsində 12 kəndə ziyan dəyib, 50 ev tamamilə dağılıb, 500 mənzilə isə 20-60% aralığında ziyan dəyib.
Qeyd edək ki, ötən gecə yerli vaxtla saat 04:00 radələrində İranın Qərbi Azərbaycan vilayətinin Xoy rayonu ətrafında 5,4 bal gücündə zəlzələ baş verib.