Bakı. Trend:
“Psixeya” (“Psyche”) adlı kosmik gəminin orbitə buraxılması əvvəlcə 12 oktyabr cümə axşamı günü üçün nəzərdə tutulmuşdu, lakin hava şəraiti ilə əlaqədar 13 oktyabr cümə gününə təxirə salınıb.
Trend-in məlumatına görə, alimlər hesab edirlər ki, dəmir və nikeldən təşkil olunan “16-Psixeya” asteroidi bir çox başqa qiymətli metalları da ehtiva edir. Onların ümumi dəyəri 10 000 kvintilyon dollar təşkil edir.
Lakin asteroidi diqqətlə öyrənmək üçün başqa bir vacib səbəb də var. Belə bir fərziyyə var ki, “16-Psixeya” formalaşmağa imkan tapmamış planetin metal nüvəsidir. Ehtimal olunur ki, Mars ölçüsündə protoplanet formalaşmağa başlayıb, lakin milyardlarla il əvvəl Günəş sisteminin şəfəqində digər böyük kosmik obyektlərlə toqquşmalar onun formalaşmasına mane olub. Buna görə də, asteroidin öyrənilməsi Yer kimi planetlərin necə meydana gəlməsini aşkar edə bilər.
Təxminən 280 km eni olan bu metalla zəngin asteroid Günəş sistemindəki ən böyük asteroidlərdən biridir. O, Yerdən təxminən 600 milyon km məsafədə, əsas asteroid qurşağında (Mars və Yupiter arasında on minlərlə kosmik daşlarla dolu bölgə) yerləşir. Asteroid 1852-ci ildə kəşf edilib.
“Psixeya” kosmik gəmisi günəş panelləri, maqnitometr, spektrometr və asteroidin səthinin təsvirlərini köçürmək üçün xüsusi kamera ilə təchiz edilib.
Kosmik aparatın asteroidə 2029-cu ildə çatacağı gözlənilir, bu müddətdə o, ümumilikdə 3,5 milyard km yol qət edəcək. Müddətin belə uzun olması mürəkkəb uçuş yolu ilə bağlıdır, çünki aparat əvvəlcə Mars ətrafında uçmalıdır, ancaq bundan sonra o, əsas asteroid qurşağına gedəcək.