Azərbaycan, Bakı, 24 aprel /Trend, müxbir İ.İzzət/
Son günlər Azərbaycanın ayrı-ayrı şəhər və rayonlarında yağışlı hava şəraiti müşahidə olunur.
Trend-in FHN-nin rəsmi saytına istinadən verdiyi məlumata görə, aprelin 23-24-də yağan intensiv yağışlar nəticəsində Bakı şəhərinin Sabunçu rayonunda bəzi ərazilərə yağış və qrunt suları dolub.
Fövqəladə Hallar Nazirliyinin müvafiq xilasetmə qüvvələri dərhal əraziyə cəlb olunub. Hazırda Mülki müdafiə qoşunlarının və Dövlət Sularda Xilasetmə Xidmətinin canlı qüvvə və texnikası ərazidədir.
İlkin məlumata görə, təxminən, 50-yə qədər fərdi yaşayış evi və həyətyanı sahə subasmaya məruz qalıb, 70-ə yaxın insan xilas olunub.
Ərazidə xilasetmə işləri davam etdirilir, yaranmış vəziyyətin nəticələrinin aradan qaldırılması üçün müvafiq tədbirlər görülür.