Azərbaycan, Bakı, 11 dekabr /Trend/
Füzuli, İmişli və Masallıda ölümlə nəticələnən yol qəzaları olub.
Trend Daxili İşlər Nazirliyinin saytına istinadən xəbər verir ki, Dekabrın 10-u saat 17: radələrində Füzuli rayonu Bala Bəhmənli kəndinin ərazisində rayon sakinləri Teymur Əhmədovun və Ramiz Məmişovun idarə etdiyi "VAZ" markalı avtomobillər toqquşub. R.Məmişov hadisə yerində ölüb, sərnişini - həmyerlisi İbiş Məmmədov və T.Əhmədov xəstəxanaya yerləşdiriliblər.
Dekabrın 10-u saat 22:00 radələrində İmişli rayonu Qaralar kəndinin ərazisində kənd sakini Eldəniz Xəmmədov idarə etdiyi "Mercedes" markalı avtomobili aşırıb. Sürücü hadisə yerində ölüb, sərnişini - həmkəndlisi Elşən Əmənova xəstəxanada ilkin tibbi yardım göstərildikdən sonra buraxılıb.
Dekabrın 10-u saat 22:00 radələrində Masallı rayonu Talışxanov küçəsində müəyyən edilməmiş avtomobillə Öncəqala kənd sakini Əlihüseyn Kərimov vurulub. Piyada xəstəxanaya aparılarkən yolda ölüb.
Masallı RPŞ tərəfindən əməliyyat-axtarış tədbirləri aparılır.