İsrail, Qüds, 25 mart / Trend , müxbir D.Xatınoğlu R.Abdullayev/ "Hizbullah" təşkilatının liderlərindən olan İmad Muqniyyənin ölümündə İsrailin heç bir əlaqəsi yoxdur, amma ölkə təhlükəsizlik xidmətləri terrora qarşı tam hazır hala gətirilib. "İmad Muqniyinin məhv edlməsində İsrailin heç bir əlaqəsi yoxdur. Buna baxmayaraq İsrail təhlükəsizlik xidmətləri terrora qarşı tam hazır hala gətirilib" - deyə İsrail XİN-nin rəsmi nümayndəsi Eddi Şapira Trend -a çərşənbə axşamı bildirib.
Muqniyyənin həlakının 40-cı günü münasibətilə keçirilən matəm mərasimində şeyx Həsən Nasrullah bəyan edib ki, Muqniyinin intiqamını alaraq, dünyadakı İsail obyektlərinə terror aktı təşkil edəcək.
Dünyanın 42 ölkəsində terrorçuluq ittihamı ilə təqibdə olan Müğniyyə fevralın 12-də Suriyada partlayış nəticəsində həlak olunub. İran və "Hizbullah" bu terrorda İsrail kəşfiyyatı "Massad"-ı günahlandırır. Suriya tezliklə terror fakti ilə bağlı tədqiqatlarının nəticəsini bildirəcəyini iddia etsə də, indiyədək bu barədə məlumat verməkdən imtina edib. İsrail Müğniyyənin ölümündə rolu olduğunu təkzib edib.
"Bizim üçün İranın İsrail ilə birbaşa qarşıdurmaya marağında olmaması yenilik deyil. Ona görə də o, Livandakı "Hizbullah", Qəzzadakı "HƏMAS" agentlərini istifadə edir" -deyə Şapira bildirib. İsrail diplomatının sözlərinə görə, Suriya da öz növbəsində İran rejiminin tam siyasi və maliyyə himayədarlığı altında olan "Hizbullah" və "HƏMAS" kimi terror təşkilatını və İsrailə qarşı fəaliyyət göstərən digər qruplaşmaları dəstəkləyir. Şapira qeyd edib ki, Dəməşq Haled Maşal və ieyx Nasralla kimi terror liderlərinə sığınacaq və sərbəst hərəkətə imkan verir.
Şapira bununla yanaşı qeyd edib ki, Suriya tez-tez İsrail ilə sülh istəyini bəyan etsə də, İranın molla rejimilə sıx hərbi-siyasi əlaqələrə malik olan rəsmi Dəməşq gerçəklikdə danışıqlara getməyəcək. "İran Suriyanı silahla təmin edir, terroru beynəlxalq səviyyədə dəstəkləyir, Qəzzadakı HƏMAS terrorçularını maliyyələşdirir. Hazırda Bəşar Əsəd rejimi İrandan asılı vəziyyətdədir" - İsrailin rəsmi nümayəndəsi söhbətini yekunlaşdırıb.
İsrailin Bar-İlan Universitetinin Beqin Sadat adına Strareji Araşdırmalar Mərəkəzinin eksperti Mordehay Kedar qeyd edib ki, "intiqam "Hizbullah" ideologiyasının bir hissəsidir". Suriya iyiriminci əsrin 70-ci illərindən başlayaraq, Fələstin azadlıq hərəkatından və İsrailə zərbə endimək üçün başqa Fələstin təşkilatlarından istifadə edib. İsrail ekspertinin sözlərinə görə, hazırda Holan yüksəkliklərini qaytarmaq üçün Livandakı "Hizbulah"ı istifadə etdiyinə görə Suriyanı qınayanlar var. Kedarın rəyincə, Suriya bütünlüklə Tehrandan asılı vəziyyətdədir. "Ərəb dünyası ərəb həmrəyliyi nöqteyi nəzərindən Bəşir Əsəd rejimini ciddi qəbul etmir. Buna görə, Dəməşqdə hər il keçirilən Ərəb dövlətləri Konfransında 22 lider ərəb dövlətləri iştirak etməyəcək"-deyə Kedar qeyd edib. İsrail politoloqunun sözlərinə görə, Dəməşqdəki konfransın ərəb liderləri tərəfindən boykot edilməsinin səbəbi ərəb dünyasında Bəşar Əsəd rejiminin "iran siyasəti" və yeni prezident seçə bilməyən Livanda gərgin vəziyyətdə Suriyanın roludur.
İranlı politoloq Əlirza Nurizadə (Alireza Nourizadə) çərşənbə axşamı Londondan telefonla Trend a bildirib ki, İmad Müğniyyə Qərbə meylli olan Livanın baş nazirinə sui-qəsd planı ilə İrandan Suriyaya səfər edib. "Ehtimal edirəm ki, Suriya bu planın nəticəsindən qorxduğu üçün Müğniyyəni öldürüb. Ola bilsin, İsrail kəşfiyyatının da bu terrorda əli olsun. Suriya, İsrail kəşfiyyatının Suriyada güclü olduğunu etiraf etməkdən çəkinir. Hər iki ehtimala görə, Suriya bu haqda tədqiqatlarının nəticəsini bildirmir"-deyə, Nurizadə bildirib.
Nurizadənin fikrincə, Həsən Nəsrullahın verdiyi bəyanata baxmayaraq, tezliklə İsraildən intiqam alacağı gözlənilmir. "Çünki, İsrail rəsmən özü qarşı hər hansı bir terror əməliyyatın həyata keçiriləcəyi təqdirdə, İran və Suriyanı günahlandıracağını bildirib"-deyə, İranlı politoloq bildirib.
Livanda prezident seçkiləri 17 dəfə ləğv olunub. Qərb və Ərəb ölkələri liqası Suriyanı bu seçkilərin keçirilməməsinin səbəbkarı kimi günahlandırır. Səudiyyə Ərəbistanı və Misir gələn həftə Dəməşqdə keçiriləcək Ərəb ölkələri liqası sammitində iştirak etməkdən rəsmən imtina edib.
