Azərbaycan, Bakı, 23 may / Trend , müxbir E.Babayev/ Azərbaycanın əsas müxalif partiyaları arasında münasibətlər gərginləşib. "Beşlər" arasında elə siyasi qüvvələr var ki, seçkilərə gedib, prosesdən maddi baxımdan bəhrələnəcəklər. Belələri ilə bir masa arxasında oturmağı artıq hesab edirik", cümə günü Trend -a müxalif Azərbaycan Xalq Cəbhəsi Partiyası (AXCP) sədrinin müavini Həsən Kərimov bildirib.
Trend -un arayışı: Beş müxalifət təşkilatını (Müsavat, Demokrat, Tərəqqi, Milli İstiqlal, Azərbaycan Naminə İctimai Forum) birləşdirən "Beşdər" Seçki Məcəlləsinə dəyişikliklərlə bağlı birgə müzakirələr aparmaq təklifi ilə çıxış edib. Gələn həftə bu məqsədlə ümumrespublika müşavirəsi keçiriləcək. Üç müxalifət partiyasının (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə toplantıya qatılmayacağını bəyan edib.
Kərimov vurğulayıb ki, "Azadlıq" blokunun seçki ilə bağlı mövqeyi hamıya məlumdur. "Biz indiki seçki qanununu qəbul etmirik və boykot yolu tuturuq. Mövqeyimizi uzun müddətdir ki, cəmiyyətə çatdırırıq. "Beşlər" nəyi müzakirə etmək istəyirlər? Söhbət boykotdan getmirsə və onlar indiki halda seçkiyə getməyi məqbul sayırsa, niyə müzakirələrdə iştirak etməliyik?" - deyə o bildirib.
ADP sədri Sərdar Cəlaloğlu isə Trend -a bildirib ki, "Azadlıq" blokunun özünü kimdənsə üstün tutması, keçmişlərini təhlil etmədən bəyanatlar verməsi doğru deyil. "Onların birgə müzakirələrdən imtinası ilk növbədə demokratik mədəniyyətin inkişaf etməməsinin göstəricisidir" - deyən Cəlaloğlu vurğulayıb ki, Xalq Cəbhəsi indiyə qədər həmişə müxalifət boykot yolu tutanda, seçkidə iştirak edib. "Əgər hansısa partiya seçkiyə gedib həqiqətən pul qazanmaq istəyirsə, niyə bu, onları narahat etməlidir. Belə çıxır ki, indiyə qədər Xalq Cəbhəsi seçkidə iştirak etdiyi üçün hakimiyyətdən pul alıb. İndi isə onlara pul verilmədiyi üçün seçkiyə getmirlər. Biz də eyni ittihamlarla çıxış edib, deyə bilərik ki, "Azadlıq" bloku boykot yolu tutması üçün hansısa xarici qurumdan və ya hakimiyyətdən pul alıb"- deyən Cəlaloğlu onu da bildirib ki, "Azadlıq" blokunun birgə müzakirələrdən imtinası Seçki Məcəlləsinə əlavə və dəyişikliklərlə bağlı müxalifətin ümumi rəyini ifadə etməyə mane olmayacaq.
Seçki Məcəlləsinə əlavə və dəyişikliklər mayın sonunda Milli Məclisdə müzakirə ediləcək.
Məqalə müəllifi ilə əlaqə ünvanı: [email protected]