Azərbaycan, Bakı, 30 may/ Trend , müxbir E.Babayev/ Müxalif Azərbaycan Milli İstiqlal Partiyasının (AMİP) İmişli rayon təşkilatı İdarə Heyətinin üzvü Musa Rahimin kassasiya şikayətinə iyunun 3-də baxılacaq. Bu barədə cümə günü Trend -a vəkil Ənnağı Məmmədli məlumat verib.
Trend -un arayışı: Rahim 2006-cı ildə həbs edilib. O, Cinayət Məcəlləsinin xuliqanlıq (221.3), hakimiyyət nümayəndəsinə qarşı müqavimət (315.1) maddələri ilə təqsirli bilinərək, 5 il müddətinə azadlıqdan məhrum edilib.
Vəkil bildirib ki, müdafiə etdiyi şəxsə qarşı ittihamlar əsassız olaraq irəli sürülüb. Rahim İmişli rayonunda baş verən özbaşınalığa, təhsildə korrupsiyaya qarşı çıxaraq, evində aclıq aksiyası keçirib. Eyni zamanda, evinin üzərinə rayondakı özbaşınalıqlara etiraz olaraq, şüarlar yapışdırıb. "Təhsil sahəsindəki çatışmazlıqlara etiraz kimi, övladlarını məktəbə getməyə qoymayıb. Bütün bunlardan sonra onu şərləyərək tutublar" - deyən vəkil bildirib ki, onlar Əli-Bayramlı rayon Appelyasiya Məhkəməsinin qərarından şikayət veriblər. İş Ali Məhkəmədə icraata götürülüb və prosesə hakim Vidadi Həşimov sədrlik edəcək.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir.
Məqalə müəllifi ilə əlaqə ünvanı: [email protected]
