Azərbaycan, Bakı, 28 avqust / Trend , müxbir İ.Əlizadə/ Azərbaycan parlamentinin Təhlükəsizlik və müdafiə məsələləri daimi komissiyasının sədr müavini Aydın Mirzəzadə hesab edir ki, Azərbaycanın "Hərbi doktrina"sı yalnız NATO sisteminə əsasən hazırlanmamalıdır.
"Azərbaycanın "Hərbi doktrina"sı həm NATO, həm də keçmiş sovet sistemində olan ən yaxşı prinsipləri əks etdirməlidir", cümə axşamı Trend -a Mirzəzadə bildirib.
Trend -un arayışı: Azərbaycanın "Hərbi doktrina"sı hazırlanır. Sənədin parlamentin payız sessiyasında qəbul olunacağı gözlənilir. Cənubi Osetiya probleminə görə, Rusiya ilə Gürcüstan arasında baş verən münaqişədən sonra Azərbaycanın "Hərbi doktrina"sının hansı formada olacağına dair suallar yaranıb. Azərbaycanın "Hərbi doktrina"sının orduda NATO sisteminin tətbiq olunmasını nəzərdə tutacağı gözlənilirdisə, Gürcüstan Rusiya müharibəsindən sonra bu siyasətin dəyişəcəyi ehtimal olunur.
Komissiyanın sədr müavini bildirib ki, Azərbaycan öz təhlükəsizliyini təmin etmək üçün ən düzgün və effektiv prinsipləri seçir.
"NATO yalnız hərbi deyil, dünyada təhlükəsizlik sistemini quran təşkilatdır. Ona görə də Azərbaycanın NATO ilə əməkdaşlığı həddən artıq əhəmiyyətlidir, lakin keçmiş sovet respublikaları ilə münasibətlər, onların potensialı və təcrübəsindən faydalanmaq da vacibdir", - deyə Mirzəzadə əlavə edib.
Məqalə müəllifi ilə əlaqə ünvanı: [email protected]
