Azərbaycan, Bakı, 02 oktyabr/ Trend , müxbir R.Novruzov/ ABŞ Azərbaycanla təhlükəsizlik məsələsi üzrə işi davam etdirir, - Bakıda mətbuat konfransında ABŞ Dövlət Katibinin birinci müavini Con Neqroponte (John D. Negroponte) deyib.
"Biz enerji məsələlərində bu region və Avropa arasında həmişə tərəfdaş olmuşuq. Bizim tərəfdaşlığımız dərinləşir, biz Bakı -Tbilisi - Ceyhan neft boru kəmərinə böyük diqqət yetiririk", - o deyib.
Neqropontenin səfəri Azərbaycanda keçiriləcək prezident seçkilərinə iki həftə qalmış baş tutub.
"Azərbaycan üçün bu seçkilər onu demokratik, düzgün və şəffaf keçirməklə, demokratiyaya sadiqliyini nümayiş etdirmək üçün bir üsuldur", - ABŞ Dövlət Katibinin birinci müavini vurğulayıb.
O, Azərbaycanın üç müxalifətçi jurnalistinin həbsxanada olmasını xatırladıb.
Azərbaycanda prezident seçkisi oktyabrın 15 - də keçiriləcək. Prezident seçkisində yeddi namizəd - Yeni Azərbaycan Partiyasının (YAP) sədri, indiki dövlət rəhbəri İlham Əliyev, müxalif Ümid Pariyasının sədri İqbal Ağazadə, Böyük Quruluş Partiyasının sədri Fazil Qəzənfəroğlu , Bütöv Azərbaycan Xalq Cəbhəsi Partiyasının sədri Qüdrət Həsənquliyev, Müasir Müsavat Partiyasının sədri Hafiz Hacıyev, Azərbaycan Liberal Demokrat Partiyasının sədri Fuad Əliyev və müstəqil namizəd Qulamhüseyn Əlibəyli iştirak edəcək.
