Azərbaycan, Bakı, 11 noyabr / Trend , müxbir K.Zərbalıyeva/ Bakı Maliyyə-İqtisad Kollecində müəllimin bıçaqlanmasına səbəb müəllimin tələbəni dərsə buraxmaması olub.
"İstintaq zamanı tələbənin müəllimini ondan rüşvət istəməsi səbəbindən qətlə yetirməsi versiyası təsdiq olunmayıb", - çərşənbə axşamı Trend -a Bakının Xətai rayon Prokurorluğundan bildirilib.
Oktyabrın 20-də kollecin II kurs tələbəsi, Bakı şəhər sakini, 1989-cu il təvəllüdlü Fərhad Elşən oğlu Məmmədov müəllimi Sabir Musa oğlu Xuduyevi bıçaqla qətlə yetirib.
Prokurorluqdan bildirilib ki, qətlin müəllimin tələbədən rüşvət istəməsi səbəbindən baş verməsini kollecin tələbələri istintaqa verdiyi ifadələr zamanı təsdiq etməyiblər.
Xudiyevin Məmmədovu dərsə buraxmaması səbəbindən müəllimlə tələbə arasında mübahisə yaranıb. Məmmədov əsassız olaraq dərsə buraxılmaması ilə barışa bilmədiyindən müəllimini bıçaqlayıb.
Məlumata görə, tələbə ilə müəllim arasında hadisədən bir neçə gün öncə də qalmaqal olub.
Həbs olunmuş Məmmədov barəsində Cinayət Məcəlləsinin qəsdən adamöldürmə (120.1) maddəsi ilə cinayət işi açılıb.
Təhsil Nazirliyinin Aparat rəhbəri İlham Pirməmmədov isə mətbuata açıqlamasında bildirib ki, tələbənin dekanla heç bir şəxsi ədavəti olmayıb. Onun sözlərinə görə, Məmmədov öz atasından və anasından ayrıldığı üçün bu, onun psixologiyasına mənfi təsir göstərib.
Məqalə müəllifi ilə əlaqə ünvanı: [email protected]