Azərbaycan, Bakı, 17 noyabr/ Trend , müxbir A.Hüseynbala/ Azərbaycanın müxalif Klassik Xalq Cəbhəsi Partiyası (KXCP) Ali Məclisinin iclasında Milli Müqavimət Hərəkatının (MMH) fəaliyyətinin bərpa olunması qərara alınıb.
"Qarabağ problemi ilə bağlı Azərbaycanın çox ciddi təzyiqlərlə üzləşməsinin qarşısını almaq üçün bütün ictimai-siyasi qurumların birgə müqavimətini təşkil etməyə ehtiyac var", - bazar ertəsi Trend -a KXCP Ali Məclisinin sədri Zəlimxan Məmmədli bildirib.
Trend -ın arayışı: Milli Müqavimət Hərəkatı eks-prezident Əbülfəz Elçibəyin təşəbbüsü ilə keçən əsrin sonlarında yaradılıb. Hərəkatda bir çox siyasi partiyalar, ictimai təşkilatlar, ayrı-ayrı ziyalılar təmsil olunurdu. MMH-ninb başlıca məqsədləri Qarabağa olan təhlükəni önləmək və demokratik dəyişikliklərə nail olmaq idi.
2006-cı ilin mart ayında Klassik Xalq Cəbhəsi Partiyasının təsis qurultayı keçirilib. Həmin vaxta qədər partiya Azərbaycan Xalq Cəbhəsi Partiyası adına iddia edirdi və "Klassiklər" AXCP-si kimi tanınırdı. Azərbaycanın eks-prezidenti, AXCP-nin sədri Əbülfəz Elçibəyin müavini olmuş Mirmahmud Mirəlioğlu 2000-ci ildə partiyanın iki yerə parçalanmasından sonra "Klassiklər" qanadına sədrlik edib. 2006-cı ildə partiyanın adında dəyişiklik edilərək KXCP adlandırılıb.
Onun sözlərinə görə, MMH-ın fəaliyyətinin bərpası ilə bağlı danışıqların aparılması vaxtilə həmin hərəkatın rəhbərliyində olmuş Mehriban Vəzirə tapşırılıb. "Siyasi təşkilatlarla məsləhətləşmələr başa çatan kimi MMH ilə bağlı vahid sənəd qəbul olunacaq", - Məmmədli vurğulayıb.
Məqalə müəllifi ilə əlaqə ünvanı: [email protected]
