Azərbaycan, Bakı, 18 noyabr/ Trend , müxbir A.Hüseynbala/ Azərbaycanın müxalif partiyası Milli Müqavimət Hərəkatının yenidən bərpa olunmasını real hesab etmir.
"Reallıqları əks etdirməyən hər hansı ideya özünə tərəfdar toplaya bilməz. İkincisi, təkamül prosesi təkrarları sevmir və təkrarlar adətən reqressiyanın əlaməti kimi meydana çıxır", - çərşənbə axşamı Trend -a Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: Milli Müqavimət Hərəkatı eks-prezident Əbülfəz Elçibəyin təşəbbüsü ilə keçən əsrin sonlarında yaradılıb. Hərəkatda bir çox siyasi partiyalar, ictimai təşkilatlar, ayrı-ayrı ziyalılar təmsil olunurdu. MMH-nin başlıca məqsədləri Qarabağa olan təhlükəni önləmək və demokratik dəyişikliklərə nail olmaq idi.
Azərbaycanın müxalif Klassik Xalq Cəbhəsi Partiyası (KXCP) Ali Məclisinin noyabrın 16-da keçirilən iclasında Milli Müqavimət Hərəkatının yenidən bərpa olunması haqda qərar qəbul olunub.
Sağ təmayüllü partiya olan ADP 1991-ci ildə Sərdar Cəlaloğlu tərəfindən təsis edilib. Partiya 2007-ci ilin yanvarınadək iqtidara qarşı radikal müxalif mövqedə olub. Yanvarda ADP-nin hakimiyyətlə dialoq qurulması ilə bağlı yeni siyasi kursu qəbul edilib. Buna etiraz olaraq keçmiş sədr Rəsul Quliyev və tərəfdarları ADP-dən imtina edərək özlərinin Açıq Cəmiyyət Pariyasını yaradıblar.
Onun sözlərinə görə, Milli Müqavimət Hərəkatını (MMH) yenidən bərpa etməyə sosial sifariş də yoxdur: "Düşünürəm ki, MMH-ni bərpa cəhdi həm də keçmişə qayıdış olardı", - Cəlaloğlu vurğulayıb.
ADP sədrinin fikrincə, indiki vəziyyətdən çıxmaq üçün müxalifət yeni inteqrasiya formaları tapmalıdır: "Klassik Xalq Cəbhəsi Partiyasının müxalifətin inteqrasiyasının zəruri oldması haqda ideyasını qəbul edirəm. Amma irəli sürülən təklif realistik olmadığından müxalifəti bir yerə toplamaq mümkün deyil".
Məqalə müəllifi ilə əlaqə ünvanı: [email protected]
