Azərbaycan, Bakı, 12 dekabr / Trend , müxbir İ.Əlizadə/Azərbaycan parlamentində təmsil olunan altı partiya -Ana Vətən, Bütöv Azərbaycan Xalq Cəbhəsi, Böyük Quruluş, Ədalət, Demokratik İslahatlar və Ümid Türkiyənin siyasi partiyaları arasında görüşün keçirilməsi məsələsində razılığa gəliblər.
"Biz konfransın Azərbaycan və Türkiyə parlamentlərində təmsil olunan partiyalar arasında bu ilin sonuna qədər Bakıda keçirilməsini nəzərdə tuturuq", -bu barədə cümə günü Trend -a təşəbbüsün müəllifi Ana Vətən Partiyasının (AVP) sədri, parlamentin deputatı Fəzail Ağamalı bildirib.
Trend -un arayışı: İki ölkənin siyasi partiyaları arasında görüş keçirilməsi Türkiyə -Ermənistan münasibətləri ilə əlaqədardır. Hər iki cəmiyyətdə yaranan narahatlğı aradan qaldırmaq üçün Azərbaycan və Türkiyənin siyasi partiyalarının yaranmış vəziyyəti müzakirə etməsi təklif olunur. Ermənistanla Türkiyə arasında əlaqələr 1993 -cü ildən kəsilib. Buna səbəb Ermənistanın beynəlxalq aləmdə qondarma erməni soyqırımı iddiaları ilə Türkiyəyə qarşı kampaniya aparması və Azərbaycanın 20 % ərazisini işğal etməsi olub.
Bu il sentyabrın 6 -da futbol üzrə Avropa çempionatı qrup oyunları çərçivəsində keçirilən Ermənistan-Türkiyə oyununa Ermənistan prezidenti Serj Sarkisyan Türkiyə prezidenti Abdullah Gülü dəvət edib. Dəvəti qəbul edənGülün bu səfərindən sonra iki ölkə arasında münasibətlərin normallaşdırılması üçün diplomatik səylər davam etdirilir. Türkiyə tərəfi eyni zamanda Ermənistan-Azərbaycan Dağlıq Qarabağ münaqişəsinin həll olunmasında da vasitəçilik etməyə çalışır. Bu məqsədlə Türkiyə xarici işlər naziri Əli Babacan Nyu - Yorkda Azərbaycan və Ermənistan xarici işlər nazirlərinin görüşünü təşkil edib.
Ağamalı qeyd edib ki, altı partiya dekabrın 16 - da məsələni yenidən müzakirə edəcək. Onun sözlərinə görə, bundan sonra Türkiyə parlamentində təmsil olunan partiyalara konfransın keçirilməsi üçün müraciət olunacaq.
Bu məsələ ilə bağlı hakim Yeni Azərbaycan Partiyasına (YAP) müraciət etməyiblər.
"YAP Azərbaycanın milli və dövlətçilik maraqlarına uyğun olan təşəbbüslərə həmişə hörmətlə yanaşıb. Hesab edirəm ki, hakim partiya bizim bu təşəbbüsümüzə də hörmətlə yanaşacaq".
Ağamalı deyib ki, Azərbaycanın digər müxalifət partiyalarına məsələ ilə bağlı müraciət etməyi planlaşdırmırlar.
"Çünki onlar bütün məsələlərə şəxsi ambisiyalarından yanaşırlar. Ölkənin istənilən problemi ilə bağlı keçirilən tədbirlərdə bütün məsələləri bir kənara qoyub, hakimiyyəti ittiham edrlər. Lakin dekabrın 16 - da keçirəcəyimiz görüşdən sonra, tədbirdə iştirak etmələri üçün digər müxalifət partiyalarına müraciət edəcəyimiz də istisna deyil ".
Məqalə müəllifi ilə əlaqə saxlamaq üçün ünvan: [email protected]