Azərbaycan, Bakı, 11 iyun / Trend , müxbir, A.Hüseynbala /
Azərbaycanın müxalifət partiyası bələdiyyələrin birləşdirilməsinin seçkilərdə müxalifətin uğur qazanmaq imkanlarını artıracağına inanır.
"Bələdiyyələr nə qədər az olarsa onların səlahiyyətləri də çoxalacaq. Amma sayı azaltmaqla yanaşı, bələdiyyələrin səlahiyyətlərini də artırmaq zəruridir", - Trend -a "Qarabağ və Respublika Uğrunda Hərəkat"da təmsil olunan Azərbaycan Demokrat Partiyasının (ADP) sədri Sərdar Cəlaloğlu bildirib.
Trend -un arayışı: Azərbaycan parlamentində ötən ay "Bələdiyyələrin birləşdirilməsi haqqında" qanun qəbul edilib. Qəbul edilən qanuna görə, Azərbaycanda bələdiyyələrin sayı 2757-dən 1766-ya enəcək.
Azərbaycanda bələdiyyə seçkisi 2009-cu ilin dekabrında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
Cəlaloğlunun sözlərinə görə, bir qrup müxalif partiyanın təmsil olunduğu hərəkat bələdiyyə üzvlüyünə irəli sürülən namizədlərin vahid siyahısını sentyabr ayında müəyyənləşdirəcək. "Bələdiyyə seçkilələrində imkanlar çox olduğundan, gərgin rəqabətlə üzləşməyəcəyik. Ona görə vahid namizədlərin siyahısısnın razıaşdırılması üçün hər cür imkan var", - partiya sədri vurğulayıb.
Onun fikrincə, vahid siyahını müəyyənləşdirmək mümkün olarsa, hərəkat seçkiyə blok şəklində gedəcək. "Bu, həm də qanunun tələbidir. Vahid siyahı ilə seçkidə iştirakımız həm də bütün bələdiyyələrdə bərabər əsasda təmsil olunmağımıza şərait yaradacaq. Mən blok yaratmaq üçün problem yaranacığını düşünmürəm", - Cəlaloğlu əlavə edib.
"Qarabağ və Respublika Uğrunda Hərəkat"ı martın 18-də keçirilən referendum ərəfəsi Azərbaycan Xalq Cəbhəsi, Vətəndaş və İnkişaf, Liberal, Demokrat, Müsavat və Ümid partiyaları, eləcə də bir neçə ictimai təşkilat təsis edib.
Məqalə müəllifi ilə əlaqə ünvanı: [email protected]
