Azərbaycan, Bakı, 3 mart / Trend , müxbir K.Zərbalıyeva/
Azərbycanın Sumqayıt şəhərində fevralın 20-də odlu silahla bir nəfəri qətlə yetirən, digərinə xəsarət yetirən şəxs barədə məlumat verən şəxsə pul mükafatı veriləcək.
Trend -un məlumatına görə, Daxili İşlər Nazirliyi və Baş Prokurorluğun birgə yaydığı məlumata görə, anonimlik tam təmin edilməklə təsdiqlənəcəyi halda bu barədə məlumat verən şəxsə 10.000 manat pul mükafatı veriləcək.
Sumqayıt şəhərində naməlum şəxs "Makarov" tipli tapançadan atəş açaraq valyutadəyişmə məntəqəsinin işçisi Vüqar Balayevi qətlə yetirib, onun atası İsmayıl Balayevə isə bıçaqla xəsarət yetirərək hadisə yerindən qaçıb.
Həmin şəxsin fotorobotu hazırlanaraq kütləvi informasiya vasitələri ilə yayımlanıb.
Cinayətdə şübhəli bilinən təxminən 25-30 yaşlı, boyu 170-175 sm., atletik bədən quruluşlu, ağ bənizli, saçları qısa şabalıdı rəngli, gözləri qıyıq formalıdır. Azərbaycan dilində sərbəst danışır.
Onu tanıyanlardan və ya yerini bilənlərdən Baş Prokurorluğun 440-78-59, Daxili İşlər Nazirliyinin 590-93-31, 492-73-96, "102 Zəng Xidməti" və Sumqayıt Şəhər Polis İdarəsinin 497-64-53 nömrəli telefonlarından birinə zəng vurmaları xahiş olunur.
Fakt üzrə Azərbaycan Respublikası Cinayət Məcəlləsinin müvafiq maddələri ilə cinayət işi başlanaraq intensiv əməliyyat-axtarış tədbirləri və istintaq hərəkətləri davam etdirilir.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
