Azərbaycan, Bakı, 08 aprel /Trend, müxbir A.Hüseynbala/
Azərbaycan müxalifətinin təsis etdiyi bloka üzv olan partiyalarda Parlament seçkiləri ilə bağlı müzakirələr aparılır.
"Partiyalar daxilində müzakirələr başa çatandan sonra, ayın axırında Parlament seçkilərində hansı formada iştirak edəcəyimiz müəyyənləşdiriləcək", - cümə axşamı Trend-ə Azərbaycan Tərəqqi Alyansında (ATA bloku) təmsil olunan Tərəqqi Partiyasının sədri Çingiz Dəmiroğlu bildirib.
Trend-in arayışı: Azərbaycanda Parlament seçkilərinin 2010-cu ilin payızında keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində keçirilir.
Dəmiroğlunun sözlərinə görə, Parlament seçkilərində iştirakla bağlı blokda təmsil olunan partiyalar arasında qeyri-müəyyənlik də hökm sürür: "Biz 2008-ci ildə keçirilən prezident seçkilərində hakim partiyanın namizədini dəstəkləmək üçün qərar qəbul etmişdik. Amma hakim partiya bizim bu mövqeyimizə ögey yanaşır", - partiya rəhbəri əlavə edib.
Onun fikrincə, hakim Yeni Azərbaycan Partiyasının dəstəyi olmadan indiki şəraitdə seçkilərdə uğur qazanmaq çətindir. "Hakim partiya, demək olar ki, bütün seçki dairələrində deputatlığa namizəd irəli sürəcək. Belə olan halda bizim irəli sürəcəyimiz namizədlərin qalib gəlmək şansları aşağı düşür. Bütün bunları nəzərə alaraq gözləmə mövqeyindəyik", - Dəmiroğlu vurğulayıb.
Partiya sədri deyib ki, seçkilərdə iştirak məsələsi gündəmdə olsa da, namizədlərin sayının çox olacağı gözlənilmir. "Hər halda, partiyaların daxilində aparılan müzakirələrin nəticəsini gözləməyə məcburuq. Bu müzakirələrdən asılı olaraq qərarımızı verəcəyik", - o xatırladıb.
Azərbaycan Tərəqqi Alyansında (ATA bloku) 21 müxalifətyönlü siyasi partiya təmsil olunur. Alyans bu partiyaların əməkdaşlıq qurumudur.
Blokda təmsil olunan partiyaların 10-u dövlət qeydiyyatından keçib.
Tərəqqi Pаrtiyаsı rаdikаl müxаlifət pаrtiyаsı kimi 10 ildən аrtıq fəаliyyət göstərib. 2008-ci ilin yаyındа lоyаl müxаlifətçiliyə kеçməк və prеzidеntliyə nаmizəd İlhаm Əliyеvi dəstəkləməк bаrədə qərаr qəbul еdib.
