Azərbaycan, Bakı, 4 oktyabr /Trend, müxbir N.İsmayılova/
ABŞ Azərbaycanda aprelin 2-də baş verən hakimiyyət əlehinə etiraz aksiyasında saxlanılanlar barəsində hökm çıxarılmasından təəssüflənir. Trend-in məlumatına görə, bunu ABŞ-ın Azərbaycandakı səfri Metyu Brayza çərşənbə axşamı jurnalistlərə bildirib.
"Biz ümidvarıq ki, apelyasiya zamanı [bu iş üzrə] Azərbaycan Avropa hüquqlarını, eyni zamanda Azərbaycan qanunvericiliyini nəzərə alacaq. Azərbaycan bir çox beynəlxalq qurumların üzvüdürsə, onların standartlarına rəayət etməlidir", - səfir deyib.
Hökm bazar ertəsi çıxardılıb. Məhkəmənin qərarına əsasən, Arif Hacili,Tural Abbaslı və Məhəmməd Məcidli hər biri 2 il 6 ay azadlıqdan məhrum olma cəzasına məhkum ediliblər.
Fuad Qəhrəmanlıya isə himayəsində iki azyaşlı uşağının olması nəzərə alınmaqla 2 il müddətinə şərti cəza verilib.
Özünü İctimai Palata adlandıran qurum bu il aprelin 2-də Bakının mərkəzində - Fəvvarələr meydanı və onun ətrafında icazəsiz aksiya keçirib.
Bu aksiya ilə bağlı saxlanılan yuxarıda adı qeyd olunan şəxslər Cinayət Məcəlləsinin 233-cü (ictimai qaydanın pozulmasına səbəb olan hərəkətləri təşkil etmə və ya bu cür hərəkətlərdə fəal iştirak etmə) maddəsi ilə ittiham olunublar.