...

İƏT Gənclər Forumu almanlara soyqırım haqqında dərs keçəcək

Siyasət Materials 3 İyun 2016 17:13 (UTC +04:00)
Almaniya Federativ Respublikasının parlamenti tərəfindən 1915-ci il hadisələri haqqında qəbul edilən qətnamə ilə əlaqədar DƏ-İKGF-nin İslam Əməkdaşlıq Təşkilatına üzv 9 ölkənin nümayəndələrindən ibarət İdarə Heyətinin təcili toplantısı keçirilib.
İƏT Gənclər Forumu almanlara soyqırım haqqında dərs keçəcək

Bakı. Trend:

Almaniya Bundestaqının məlum qətnaməsi ilə bağlı bəyanatla çıxış edən Dialoq və Əməkdaşlıq Uğrunda İslam Konfransı Gənclər Forumunun (DƏ-İKGF) sədri Elşad İskəndərov bildirib ki, Almaniya Federativ Respublikasının parlamenti tərəfindən 1915-ci il hadisələri haqqında qəbul edilən qətnamə ilə əlaqədar DƏ-İKGF-nin İslam Əməkdaşlıq Təşkilatına üzv 9 ölkənin nümayəndələrindən ibarət İdarə Heyətinin təcili toplantısı keçirilib.

E.İskəndərov qeyd edib: "İdarə Heyəti yekdilliklə hüquqi əsası olmayan və tarixi faktlara zidd olan bu qətnaməni pisləyib. Nəzərə alsaq ki, nə 1992-ci ildə Azərbaycanın Xocalı şəhərində erməni silahlı qüvvələri tərəfindən törədilmiş soyqırım aktının, nə də 1915-ci ildə Anadoluda türklərin, kürdlərin və digər xalqların erməni terror qruplaşmaları tərəfindən kütləvi qırğına məruz qalmalarının Almaniya parlamenti tərəfindən qınanmasını eşitməmişik, bu səsvermənin "ikili standartlar"ın təzahürü və tarixi debatdan Türkiyəyə qarşı siyasi təzyiq vasitəsi kimi istifadə etmək cəhdi olduğunu hesab edirik".

Forumun sədri bildirib ki, DƏ-İKGF tarixi faktların bu cür siyasiləşdirilməsindən və bir tərəfin mürəkkəb xarakterli faciəvi bir hadisədə günahlandırılmasından narahatdır: "Belə bir addım milyonlarla türk əsilli Almaniya vətəndaşının vəziyyətini potensial təhlükə altına qoya bilər. Bundan başqa, Almaniyanın və ümumilikdə Avropanın bütün müsəlman icmalarının qara piar kampaniyalarının böyük mənfi təsirləri ilə üz-üzə gəlməsinə, gələcəkdə Avropada icmalararası və mədəniyyətlərarası münasibətlərə mənfi təsir göstərə bilər".

DƏ-İKGF-nin sədri, həmçinin bəyan edib: "Həm İƏT, həm də Avropa ölkələrinin gənclərinə 1915-ci il hadisələri ilə bağlı həqiqi tarixi faktları çatdırmaq üçün DƏ-İKGF, İslam Əməkdaşlıq Təşkilatı platformalarında lazımi diplomatik addımlar atacaq və "XX əsrdə müsəlman icmalarının humanitar fəlakətlərinin anımı üçün İƏT Xatirə günü" proqramı çərçivəsində 1915-ci ildə Anadoluda müsəlman xalqlarının ermənilər tərəfindən qətliamları üzrə təhsil proqramını aktivləşdirəcək".

Məqalədə:
Xəbər lenti

Xəbər lenti