Bakı. Trend:
Abşeron Rayon İcra Hakimiyyətində Həştərxan vilayətinin qubernatorunun rəhbərlik etdiyi nümayəndə heyəti ilə görüş keçirilmişdir. Görüşdən əvvəl Abşeron RİH başçısı Abdin Fərzəliyev, Rusiya Federasiyasının Həştərxan vilayətinin qubernatoru İqor Babuşkin və onun rəhbərlik etdiyi nümayəndə heyəti Fəxri Xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini dərin ehtiramla yad etmiş, məzarı önünə tər güllər düzmüşlər.
Görkəmli oftalmoloq-alim, akademik Zərifə xanım Əliyevanın da xatirəsi ehtiramla anılmış, məzarı üzərinə tər çiçəklər qoyulmuşdur.
Dünya şöhrətli müğənni, xalq artisti Müslüm Moqamayevin də xatirəsi anılaraq abidəsi önünə çiçəklər düzülmüşdür.
Daha sonra iştirakçılar Xırdalan şəhərinə gələrək burada 1941-1945-ci illərdə Böyük Vətən Müharibəsində həlak olan həmvətənlərimizin əziz xatirəsinə ucaldılan abidəni ziyarət etmiş və xatirələrini ehtiramla yad etmişlər.
RİH binasında baş tutan işgüzar görüşdə Abdin Fərzəliyəv
qonaqları Xırdalan şəhərində salamlamaqdan məmnunluğunu ifadə
edərək Abşeron rayonu, onun tarixi, memarlığı, yerləşdiyi coğrafi
mövqeyi, təbii sərvətləri, turizm və iqisadi imkanları barəsində
ətraflı məlumat vermişdir. Həştərxanlı investorları Abşerona dəvət
edən Abdin Fərzəliyev onlar üçün lazimi imkanların yaradılacağını
qeyd etmiş, rayon ərazisində fəaliyyət göstərən sahibkarlıq
obyektləri və onların istehsal etdiyi məhsullar haqqında
danışmışdır.
Abşeronla Həştərxan vilayəti arasında əlaqələrin daha da
genişləndirilməsi üçün potensialın olduğunu vurğulayan RİH başçısı
rayon ərazisində yeni-yeni iş yerlərinin açıldığını və
sahibkarlığın, eləcə də investisiya mühitinin inkişaf etdirildiyini
qonaqların diqqətinə çatdırmışdır.
Öz növbəsində İqor Babuşkin göstərilən yüksək səviyyəli qonaqpərvərliyə görə minnətdarlığını ifadə edərək Abşeron rayonu ilə Həştərxan vilayəti arasında çoxlu ortaq cəhədlərin olduğunu və əməkdaşlıq üçün böyük imkanların mövcudluğunu qeyd etmişdir. İqtisadi əlaqələrin inkişaf etdirilməsi istiqamətində yeni üfüqlərin açıldığını qeyd edən İqor Babuşkin Abşeron rayonunda istehsal olunan məhsulların Həştərxan vilayətində, eləcə də oranın məhsullarının Xırdalan şəhərində satış mərkəzlərinin yaradılmasının məqsədəuyğun olduğunu bildirmişdir.
Abdin Fərzəliyevi Həştərxan vilayətində işgüzar səfərə dəvət edən İqor Babuşkin Azərbaycan Respublikası ilə Rusiya Federasiyası arasında ikitərəfli münasibətlərin müxtəlif sahələrdə uğurla inkişaf etdiyini, ölkələrimizin səmərəli əməkdaşlıq həyata keçirdiyi bildirmişdir.
