"Yeni Azərbaycan Partiyası (YAP) namizəd vermədiyi seçki dairəsindən namizədliyi qeydə alınan və xalq tərəfindən hörmət bəslənilən nüfuzlu şəxsləri dəstəkləyəcək". Bu barədə Trend agentliyinə YAP-ın icra katibi Əli Əhmədov bildirib.
Ə.Əhmədovun sözlərinə görə bununla bağlı partiya rəhbərliyi mövqeyini açıq şəkildə bildirib: "Biz bir qədər müşahidə aparacağıq. Elə seçki dairələri var ki, oradan cəmiyyət arasında tanınan, böyük hörmətə malik şəxslərin namizədliyi qeydə alınıb. YAP həmin şəxslərin seçki təbliğatına dəstək verəcək".
YAP-ın icra katibi onu da bildirib ki, bu, yalnız seçkilərə müstəqil şəkildə qatılan şəxslərə şamil ediləcək. Hakim partiya tərəfindən bu dəstəyin hansı formada həyata keçiriləcəyinə gəlincə, Ə.Əhmədov: "YAP öz namizədlərini necə dəstəkləyəcəksə, onları da elə dəstəkləyəcək. Biz onlarla öz namizədlərimiz arasında fərq qoymayacağıq", - deyə vurğulayıb.
